Bok Me Lapeny

◼ Bukke aryo mene ma omyero wati kwede me kwan ki lutino kwanwa me Baibul?

Buk me Baibul Pwonyo obedo bukwa ma pire tek me cako ki dong kwano Baibul ki dano. Kadi bed ni kiromo cako tic ki jami calo trakgi me cako kwan ki dano moni, ento omyero kilokke woko cutcut i buk me Baibul Pwonyo ka twere. Adwogi mabeco dong otyeko nen i tic ki buk me Baibul Pwonyo me cako kwano Baibul ki dano.

Ka dong wutyeko kwano buk me Baibul Pwonyo dok latin kwan meno tye ka dongo, ci omyero wukwan buk me Wor Lubanga. (Kol. 2:7) Pot karatac me 2 tito tyen lok mumiyo kicoyo buk man, ni: “Baibul cuko cwiny jo ducu ma gimaro Lubanga me ‘dongo malo i tut’ pa lokke me ada man. (Jo Epeco 3:18) Kiyubo buk man pi tyen lok meno. Wageno ni buk man bikonyi me dongo i yo me cwiny, ki dok me wek ibed ma i yubbe maber me wot i yo mading ma tero dano i kwo i lobo manyen me kit ma atir pa Lubanga.”

Ka latin kwan meno dong opore me nongo batija ma peya otyeko kwano buk aryo-ni ducu, ci kwanwu omyero omedde nio ka wutyeko buk me aryone-ni. Kadi bed latin kwan meno onongo batija, ngat ma kwano kwede-ni pud romo medde ki miyo ripot i kome macalo latin kwanne me Baibul kun kwano cawa kacel ki dok cen ka lim bene. Latit kwena mo ma bikonye i cawa me kwangi-ni bene bikwano cawa ma en otero.