Pwony Jo ma pe Gingeyo Kwan Maber
1. Peko ango ma waromo rwatte kwede i ticwa me pwony?
1 Ka watye i ticwa me pwony, kicel kicel warwatte ki peko me pwonyo ada bot jo ma pe gingeyo kwan maber. Ngo ma wan waromo timone?
2. I yo ango ma waromo nyutu kwede woro bot jo ma pe gingeyo kwan maber dok pingo?
2 Nyut Woro Botgi: Gin ma pire tek bot Jehovah aye kit ma cwiny ngat moni tye kwede ento pe rwom me kwanne. (1 Cam. 16:7; Car. 21:2) Pi meno, pe myero waca jo ma pe gingeyo kwan maber. Pien jo ma kit meno aye dok giromo ye kony ka ce wanyutigi woro ki diyo cwiny. (1 Pet. 3:15) Man te lokke ni pe myero wadi ngati mo me kwano ginacoya nyo paragraf adiya. Ka ngat moni medde ki pwonyo ada ma tye i Baibul, en romo dongo rwom me kwanne dok mitine me medo kero me kwanne medde pi nongo yomcwiny me kwano Lok pa Lubanga ki dong ‘lwodo lok i kom cikke dyeceng ki dyewor.’—Jab. 1:2, 3.
3. Yo mapat pat ango ma waromo tic kwede me pwonyo jo ma pe gingeyo kwan maber?
3 Yo Mapat pat me Pwonyo Lutino Kwan me Baibul: Tic ki cal obedo yo maber atika me pwonyo dano dok poyo wigi i kom ngo ma dong gupwonyo woko con. Iromo penyo latin kwan wek otit ngo ma tye ka timme i cal ma tye i buk ma wutye ka tic kwede-ni. Ti ki lapeny ma romo konye niang pwony ma tye i cal meno. Ti ki ginacoya ma loko i kom cal meno. Wuromo tic ki cal me wot wiye wiye i kom ngo ma dong wupwonyo. Pe wunyam jami mapol ka wutye ka kwan. Lok i kom wi lok madit ki lok ma pigi tego me pwony meno, dok pe ikel ngec mukene ki woko. Kwan ginacoya ki i Baibul, dok iti ki lapeny ma romo konyo latin kwan me niang ngo ma kikwano. Man romo konyo dongo mitine pi yubo kwanne wek okonye me kwedo ada mukene ma tye i Baibul.
4. Waromo konyo latin kwanwa me Baibul nining me dongo kero me kwanne?
4 Kony me Dongo Kero me Kwanr: Jo ma pe gingeyo kwan maber nyo ma pe gunongo kare muromo me pwonyo kwan giromo niang dok gimako jami maber. Iromo cuko cwiny jo ma kit magi me tic ki dwan ma kimako amaka ma a ki i bukkewa. Winyo ki diro kit ma kikwano kwede ki dok lubune ki i buk, nyo lubu kwanone kun nongo en bene nwoyo lok pa lakwan buk ki i cwinye, bidongo kero me kwan pa ngat meno. En bene romo nongo kony ki i brocuwa me Ket Cwinyi i Pwonyo Kwan ki Coc. I kabedo mukene, luelda giromo cako kilaci me pwonyo kwan i kacokke. Yub magi romo konyo jo ma pe gingeyo kwan maber wek guniang “coc maleng,” ma romo konyogi me nongo larre.—2 Tem. 3:15.