Kit me Konyo Jo ma Pe Gingeyo Kwan Maber

1. Ariya ango ma wanongo ki i pwonyo Baibul bot jo ma pe gingeyo kwan?

¹ Rwod ot ma pe ngeyo kwan twero nyuto miti i kom lok pa Lubanga, ento nongo lworo Baibul ki bukke mukene. Miyo bot jo ma kit meno buk me Baibul Pwonyo i acakkine pe twero konyogi muromo. Watwero konyo jo magi i yo me cwiny nining? Wapenyo lutit kwena mucwiny ma gua ki i lobe makato 20 mapatpat ngo ma gitimo. Gin gumiyo tam magi.

2. Bukke mene ma watwero tic kwede me konyo ngat ma pe ngeyo kwan maber?

² Ka latin kwan ngeyo kwan manok nyo pe ngeyo kwan kulu, wuromo cako kwan ki brocuwa calo Winy Lok pa Lubanga nyo Winy Lok pa Lubanga Wek Ibed Kwo Nakanaka. Painia acel me Amerika nyuto brocuwa aryo ducu bot rwod ot ci penye mene ma en mito kwanone. Jang gang kal me Kenya ocoyo ni brocuwa magi gikonyo adada pien i Afrika, watiyo ki ododo me pwonyo dano, me ka tic ki lapeny ki lagam. Kadi bed ni ngat mukwano twero jolo lapeny ki lagam, ento yo me kwan meno twero kelo lworo bot ngat ma pe ngeyo kwan maber. Ka latin kwan ngeyo kwan manok, lutit kwena mapol gimaro cako ki kwano brocuwa me Kwena Maber Mua ki Bot Lubanga!, Itwero Bedo Larem Lubanga! nyo Bukka me Ododo me Baibul.

3. Ngec ango i kom jo ma pe gingeyo kwan maber ma twero konyowa me pwonyogi ki Baibul?

³ Pwogi: Jo ma pe gingeyo kwan lewic makogi, dok pol kare gipe ki gen i komgi kengi. Konyogi wek gubed agonya aye yo mukwongo me pwonyogi ki ada. Pol pa jo ma pe gingeyo kwan giryek dok gipwonnye. Nyut botgi woro dok iket deyo i komgi. (1 Pet. 3:15) Gibimito medde ki kwan ka giwinyo ni tutegi tye ka nyako nyige dok gitye ka dongo i yo me cwiny. Pi meno bed ka pwoyogi teretere.

4. Watwero cuko cwiny jo ma pe gingeyo kwan maber me yubbe pi kwangi nining?

⁴ Kadi bed latin kwan pe ngeyo kwan maber, cuk cwinye me yubo buk-ke. Lutit kwena mogo me lobo South Africa gicuko cwiny lutino kwangi me penyo ngat ma ngeyo kwan i kin jo me otgi wek okonygi ki kwan. Latit kwena mo i lobo Britain cuko cwiny lutino kwanne me yubo bukgi ki miyo botgi buk ma mege ni guti kwede manok i kare me kwangi wek gunen kit ma miyo lagam yot kwede ka ingolo te lagam. Omego mo acel i India cuko cwiny latin kwanne me neno cal ma tye i pwony ma anyim wek owot ki lwodone con.

5. Watwero diyo cwinywa ka watye ka kwan nining?

⁵ Di Cwinyi: Labongo paro pi buk ma wutye ka tic kwede, ket cwinyi i kom lok ma pigi tego dok ikony latin kwanni me niang lok magi maber. I acakkine, romo bedo ber ka wunyamo lok pi dakika 10 nyo 15 keken. Pe inyam lok mapol tutwal, ento wunyam paragraf manok keken i kwan me nino moni. Di cwinyi ka ce latin kwanni kwano motmot. Bimiyo en pwonyo kwan maber kun dongo pwocce pi Jehovah. Me konyo en me timo meno, bedo ber ka ilwonge me bino i cokke i acakki me kwanwu.

6. Watwero konyo dano wek gupwony kwan nining?

⁶ Ka lutino kwan gupwonyo kwan, gibidongo i yo me cwiny oyotoyot. (Jab. 1:1-3) Jo mapol dong gukonyo lutino kwangi me kwan, kun gitiyo ki buk me Ket Cwinyi i Pwonyo Kwan ki Coc pi cawa manok i agikki me kwangi ducu. Ka latin kwan cwinye otur, iromo cuko cwinye ki lok i kom jami mogo ma en dong opwonyo. Cuk cwinye ni Jehovah bigoyo laane i kom tutene, dok en myero omedde ki lega pi kony. (Car. 16:3; 1 Jon 5:14, 15) Lutit kwena mogo i lobo Britain gicuko cwiny lutino kwangi me keto yub ma cobbe​—calo mako nukuta i wigi, yenyo ki kwano wang Baibul mogo ki dong kwano bukkewa ma kwanogi yot. Konyo dano me pwonyo kwan kwako tugo cwinygi me dongo miti me timone, ento pe pwonyogi kit me kwan keken.

7. Pingo omyero pe walwor pwonyo lok me ada bot jo ma pe gingeyo kwan maber?

⁷ Jehovah pe cayo jo ma pe gunongo kwan me cukul muromo. (Yubu 34:19) Jehovah ngiyo cwiny dano aye. (1 Tek. 28:9) Pi meno pe ilwor pwonyo lok me ada bot jo ma pe gingeyo kwan maber. Itye ki jami tic mabeco mapol ma itwero tic kwede. Lacen, itwero lokke i buk me Baibul Pwonyo wek ikony latin kwanni me niang Ginacoya maber.