Pwony i Yo ma Niang iye Oyot
1. Gin ango ma pire tek ma miyo pwonywa bedo maber?
1 Pire tek ni omyero wapwony i yo ma niange oyot wek pwonywa obed maber. Ngiyo kit ma Lapwony Madit, Yecu opwonyo kwede romo konyowa me dongo ‘dirowa me pwony.’—2 Tem. 4:2; Jon 13:13.
2. Pwony i yo ma niang iye yot kwako ngo, dok man kelo adwogi ango?
2 Lok i Yo ma Niange Oyot: Pwony ma Yecu omiyo i Wi Got-ti opong ki ada ma gudu cwiny ma oloyo lok pa dano mo keken, ento olokogi i yo ma niange oyot. (Mat., cura 5-7) Lwak ma gubedo ka winyo Yecu “guuro kit pwonye matek.” Pwony pa Yecu ogudu bene cwiny askari ma kicwalogi me make mumiyo guwacci: “Pe tye ngat mo ma yam oloko macalo dano man.” (Mat. 7:28, 29; Jon 7:46) Pe mitte ni myero wati ki lok madongo, leb ma niang iye tek, nyo lapor matego wek ada odony i cwiny dano. Waromo pwonyo ada i yo ma niange oyot ka watiyo ki jami ma dano ngeyo.
3. Pingo jo mukene gimiyo ngec mapol mukato kare woko bot luwinygi, dok man waromo gwokke ki iye nining?
3 Pe Imi Ngec Madwong Tutwal: Yecu obedo ka tam i kom kodi ngagi ma en nongo etye ka lok kwedgi me pimo ngec ma myero eminigi i cawa moni. (Jon 16:12) Wan bene myero waniang dok walok kit me lokwa ma lubbe ki miti pa jo ma waloko kwedgi, tutwalle ka watye ka miyo caden bot wadiwa, jo manyen ma gitye ki miti, nyo lutino. Pe myero waminigi ngec mapol mukato kare woko kadi bed pud ginen ni giciko itgi adada. Jo ma gitye ki cwiny matir gibimedde ki nongo ngec pa Lubanga me ada, Jehovah.—Jon 17:3; 1 Kor. 3:6.
4. Pingo pire tek ni waket cwinywa i lok ma pigi teko ma ka duru lok mapol?
4 Ket Cwinyi i Lok ma Pigi Tego: Yecu pe omiyo niange pwonye obedo tek ki duru lok mapol. I kare ma en owacci: “Jo ducu ma tye i lyel . . . gibikatti woko,” onongo pe obedo kare me miyo ngec matut ma lubbe ki ngo ma bitimme i kom gurup aryo pa dano ma kibicerogi-ni. (Jon 5:28, 29) Ka watye ka kwan ki lutino kwan me Baibul, omyero waket cwinywa i lok ma pigi tego kun wagwokke wek pe wakel jami ma pe i buk i nyamo lokwa.
5. Mot ango ma wanongo ka ce wapwonyo i yo ma niange oyot?
5 Cwinywa pud dong yom ni jami ducu ma wamito ngeyone Jehovah opwonyogi i yo ma niange oyot! (Mat. 11:25) Pi man dong waketu cwinywa me pwonyo pwony i yo ma niange oyot kun wanongo yomcwiny i tic me pwony ma nyako nyige.