Ticwa me Pwony—Yo me Nyutu Marwa pi Lubanga
1. Maro Lubanga omiyo Yecu otimo ngo?
1 Mar aye omiyo Yecu ocobo ticce me pwony. Kit yo me pwony ma patpat pa Yecu ducu onyutu ka maleng ni en onongo maro Jehovah. Yecu owacci: “Wek lobo onge ni, an amaro Won, atiyo macalo Won ocika.” (Jon 14:31) Wan macalo lulub kor Yecu bene watye ki mot me nyutu marwa pi Lubanga i ticwa me pwony.—Mat. 22:37; Ep. 5:1, 2.
2. Marwa pi Jehovah gudo ticwa me pwony nining?
2 ‘Nyingi Kiwor’: Ka watiyo ki mit kom i kare mo keken ma onen me tito bot jo mukene lok i kom Jehovah kacel ki Ker-re, nongo wanyutu marwa pi Lubanga, ma meno rom ma watye ka medo woro nyinge. (Jab. 83:18; Ejek. 36:23; Mat. 6:9) Ticwa me pwony bene kare ducu nyutu ni wan wamito ni giwor nying Jehovah dok ni mitine otimme, calo kit ma tic me pwony pa Yecu onyuto kwede.—Mat. 26:39.
3. I yo ma nining ma marwa pi Jehovah konyowa me kato ariya?
3 Mar Konyowa me Kato Ariya: Pe tye gin mo madit loyo marwa pi Jehovah. (1 Kor. 13:4, 7) Yecu orwatte ki ariya mapol ma onongo romo juko wa ticce me pwony woko. Ento, i kare ma en orwatte ki pekki magi, marre kacel ki mitine me timo tic pa Jehovah okonye me loyogi. (Mar. 3:21; 1 Pet. 2:18-23) Wan bene warwatte ki pekki mapol, ma marwa pi Lubanga romo konyowa me loyogi. Ka ce walubu lanen ma Kricito oweko, ci wabedo ki tekcwiny dok labongo lworo me cobo ticwa me pwony. Kadi bed warwatte ki aunauna ma a ki bot jo me ot, peko me yotkom, tiyo, nyo cwiny manok ma dano ginyuto i lokwa, meno pe gengowa nyutu marwa pi Jehovah ki tiyo ticwa me pwony maber.
4. Marwa pi Jehovah miyo watimo ngo?
4 Mar tye ki teko, dok watye ki kero me nyutu marwa pi Lubanga ki tiyo ticwa me pwony ki cwinywa ducu. (1 Kor. 13:13) Kit ma dong watye ka nyikke cok tutwal ki kare ma gibiworo nying Jehovah matwal-li, walego ni ‘marwa myero odong omedde ameda.’—Pil. 1:9; Mat. 22:36-38.