Lok pa Lubanga Tiyo Matek
1. Wi lok madit me gure me nino acel pi mwaka me ticwa me 2014 tye ningo?
1 Mapat ki gin ma dano ma gitye ki roc aye gucoyo, Baibul tye ki teko me loko kwowa, tiro tamwa ki kitwa i yo ma lubbe ki miti pa Jehovah. Lok pa Lubanga tye ki teko ma romene? Waromo tic ki tekone i kwowa nining? Watwero tic kwede me konyo jo mukene nining? Watye ki gen ni jo ducu gibidongo i yo me cwiny i nge winyo pwony magi ma kibinyamogi i kare me gure me nino acel ma kitye ka yubone pi mwaka me ticwa me 2014. Wi lokke tye ni “Lok pa Lubanga Tiyo Matek,” ma kikwanyo ki i Jo Ibru 4:12.
2. Myero watemme me niang lagam me lapeny mene?
2 Nong Lagam me Lapeny Magi: Ka itye ka winyo yub me gure, temme me niang lagam me lapeny ma kiryeyogi piny kany.
• Pingo myero wagen Lok pa Jehovah? (Jab. 29:4)
• Teko me Lok pa Lubanga romo tic i kwowa nining? (Jab. 34:8)
• Itwero tic ki teko me Lok pa Lubanga i ticci me pwony nining? (2 Tem. 3:16, 17)
• Waromo gwokke ki bita marac me lobo pa Catan-ni nining? (1 Jon 5:19)
• In macalo bulu, iromo tic pi Lubanga maber nining? (Jer. 17:7)
• Waromo bedo ki teko kadi bed wagoro nining? (2 Kor. 12:10)
• Ngo ma mitte wek wabed ka loko kwowa, kadi bed onongo kitwa obedo marac pi kare malac? (Ep. 4:23)
3. Mapat ki bedo ka winyo pwony, yo ango mukene ma watwero nongo kwede adwogi maber ki i yub me gure me nino acel?
3 Pud dong wabinongo adwogi maber ki i ngec ma pigi tego ya! Medo i kom meno, gure me nino acel man, rom ki gure me adwol kacel ki gure me distrik, pien biminiwa kare maber me ribbe kacel ki omegiwa ki lumegiwa me kacokke mukene. (Jab. 133:1-3; 2 Kor. 6:11-13) Pi man kwany kare me ribbe kacel ki omege ki lumege ma ingeyogi con, dok bene imak lirem ki jo manyen. Ka tye lalok ma obino ka lim pi yub me gure pi nino acel man, calo laneno me distrik nyo omego ma oa ki i Betel, pingo pe ikwany kare me moto ki jolo en kacel ki dakone? Adada, watye ki tyen lok ma pire tek ma miyo wabedo ki miti madwong me kuro nino me gure meno!