Lweny ki Peko me Miyo Caden bot Co

1. Ngo ma mitte mada i lok ma dok i kom timo tic me Ker-ri?

¹ Kit ma tic me tito pi kwena me Ker-ri tye ka medde i kare me agikki-ni, co ma gucwiny i yo me cwiny mitte mada me telo yo i tic man pi oyot. (Mar. 4:30-32; Tic 20:28; 1 Tem. 3:1-13) Ento i kabedo mogo, wel co ma gitye ka jolo kwena me Ker-ri nok ka i poro ki mon. I tekwaro mukene, co gitamo ni obedo tic pa mon me pwonyo lutino ki lok me dini. Wan waromo cuko cwiny co mapol me tamo pi lok me cwiny kun giribbe kwedwa i woro me ada nining?

2. Tute pa Paulo ki Petero i miyo caden bot co okelo adwogi mabeco ango?

² Ket Cwinyi i Miyo Caden Bot Co: Ka lawi ot mo ojolo lok me ada, pol kare en bedo ki kero me konyo jo me ode me ribbe kwede i woro me ada. Me laporre, i kare ma kitweyo Paulo ki Cira i buc pi tito lok me kwena, gin gumiyo caden bot lagwok mabuc mo acel. Laco-ni ki jo me ode ducu gunongo batija. (Tic 16:25-34) “Kuricipo, ladit me kacokke, oye Rwot ki jo ma i ode ducu” pi lok me kwena ma Paulo otito i Korint. (Tic 18:8) Jehovah otiyo ki Petero me miyo caden bot Kornelio ladit wi dul askari, ma kiwacci onongo obedo ‘laco ma woro dok lworo Lubanga.’ Kornelio kacel ki wadine ki dong luwote macok kwede gunongo batija.​—Tic 10:1-48.

3. I lubu lanen pa Pilipo, ngagi me “rwom ma malo” ma iromo miyogi caden?

³ Miyo caden bot co ma gitye “i rwom ma malo” romo bedo ki adwogi maber adada. (1 Tem. 2:1, 2) Me laporre, lamalaika pa Jehovah owaco bot Pilipo ni olok ki ‘laco mo ma latic madit’ ma onongo obedo lakan jami ducu pa Kandake daker me lobo Etiopia. Pilipo owinyo ka laco-ni tye ka “kwano buk pa lanebi Icaya” ci otite kwena maber madok i kom Yecu. Laetiopia man odoko lakwena dok bene nen calo otito kwena maber-ri bot dano i kare ma tye ka dok i lobo­ne. En bene nen calo omiyo caden bot daker ki jo ma gitiyo i gang kalle, jo ma onongo pe gitye ki kare ma oromo me winyo kwena maber-ri.​—Tic 8:26-39.

4. Waromo miyo kare ki co me winyo kwena maber-ri nining?

⁴ Kit me Lok ki Co Mapol: Kit ma co i dyeceng lung nongo gitye i dog ticgi-ni, tika iromo keto yubbi me cwalo cawa malac i tic me pwony i otyeno, i tum cabit, nyo i kare me yweyo? Tic kare ki kare i kabedo me cato wil bimini kare me miyo caden bot co ma ginonge paco kicel kicel. Utmego bene giromo tute me miyo caden ma pe guyubbe iye bot lutic luwotgi ma co. Ka gitye i tic me pwony i ot ki ot, tutwalle i wang tic ma kimaro tic iye, utmego giromo penyo me lok ki lawi ot.

5. Lamego ma onongo laco ma onyutu miti i kwena me Ker myero otim ngo?

⁵ Lamego ma onongo laco ma onyutu miti i lok me ada omyero pe odok cen ka lim kene. En romo dok cen gin ki cware nyo latit kwena mukene. Ka dong laco-ni tye ka dongo i yo me cwiny, bedo ber ka en omiyo bot omego mo ma ocwiny.

6. Wan waromo lubu lanen pa Paulo nining wek ‘wanong dano mapol’?

⁶ Yer Pwony ma Gudo Cwiny Co: Lakwena Paulo otamo pi jo ma winye dok oloko yo me pwonye wek ‘enong dano mapol.’ (1 Kor. 9:19-23) I yo acel-lu, wan bene omyero watam i kom pwony mene ma romo gudo cwiny co ma warwatte kwedgi wek wayubbe maber. Me laporre, co pol kare gitamo pi peko me can lim, gamente maber, ki dong ber bedo pa jo me odigi. Giromo bene nyutu miti i jami calo tyen lok me kwo, anyim pa lobo-ni, ki pingo Lubanga oweko dano deno can. Dano bijolo kwena me Ker-ri maber ka wanyutu niang matut ma kit man i pwonywa.​—Car. 16:23.

7. Jo ducu ma i kacokke giromo gudo kwo pa lawi ot ma pe i niye ma obino i cokke nining?

⁷ Kwany Kare me Konyo Luwi Odi ma Gipe i Niye: Kadi bed ber kit lumegiwa ma gin Lukricitayo gudo kwo pa cogi ma gipe i niye tutwal, ento jo ma i kacokke bene giromo gudo kwo pa kodi co-ni. (1 Pet. 3:1-4) Ka lawi ot ma pe i niye obino i cokke gin ki dakone, jol me lirem ma jo ma i kacokke mine bedo caden magwa adada. Bedo tye mere i cokke nyutu ni en tye ki miti i lok me ada, dok bene romo ye ni kikwan Baibul kwede.

8. Omego giromo konyo luwi odi ma gipe i niye ma gitye ki miti manok i lok me ada nining?

⁸ Kitungcel, luwi odi mukene ginyutu miti manok i jami me cwiny ento lacen dok giromo ye me kwano Baibul ki omego mo ma gitye agonya me lok kwede. Omego me kacokke mo acel guketo tek me limo luot mo ma dinigi opokke woko pi lok ki lawi ot ma pe i niye-ni i kom jami ma en tye ki miti iye. Man omedde oo wa i kwano Baibul, en dong kombeddi onongo batija woko. Omego acel bene okonyo lawi ot mo ma pe i niye ki goyo cel me rumo ode. Nyutu miti i yo ma kit man, omiyo lawi ot-ti oye kwano Baibul. (Gal. 6:10; Pil. 2:4) Ka ibedo omego ma Lakricitayo, tika itwero kwanyo kare me lok ki luwi odi ma gipe i niye?

9. Adwogi ango ma pwonyo co ma gubedo Lukricitayo romo kelo?

⁹ Pwonnye pi Kare me Anyim: Co ma gijolo kwena me Ker-ri dok gutute me bedo ma gupore me tiyo tic pa Jehovah giromo bedo i kin “mot bot dano,” luelda ma gitiyo ki ngecgi kacel ki kerogi me konyo kacokke pa jo pa Jehovah. (Ep. 4:8; Jab. 68:18) Co ma kit meno gikwayo jo me kacokke labongo dic dok ki mit kom. (1 Pet. 5:2, 3) Pud dong gubedo twon mot madit atika bot utmego ma i wi lobo ducu ya!

10. Tute pa Anania me konyo Paulo okelo adwogi maber bot dano mapol nining?

¹⁰ Me laporre, Caulo odoko ‘lakwena bot lurok,’ kadi bed ni en kong onongo obedo ka uno Lukricitayo. (Rom. 11:13) Man aye tyen lok ma omiyo lapwony Anania kong okwero tito lok bot Caulo. Ento, Anania oye lok ma Rwot owacce, ci oloko ki laco ma lacen odoko lakwena Paulo. I mwaki mapol, tic me pwony pa Paulo okelo adwogi maber bot dano alip mapol ma guwinye i kare ma en tito lok me kwena dok bene dano milion mapol pud gitye ka medde ki nongo adwogi maber ki i waragane ma gitye i Lok pa Lubanga.​—Tic 9:3-19; 2 Tem. 3:16, 17.

11. Pingo omyero walok yubwa kit ma mitte kwede wek wami caden bot co?

¹¹ Pi meno, omyero walok yubwa kit ma mitte kwede wek wami caden bot co. Ka wamedde ki yelle i lok man, ci omyero wabed ki gen ni Jehovah bigoyo laane i kom tutewa me timo mitine ki dong timo tic me Ker-ri.