Itwero Tute me Ngeyo Luot Acel Moni ma Pe i Niye?
1. Ngo mumiyo pe tye ni Lukricitayo ma dinigi opokke woko gin ki luotgi keken aye gitye ki miti me konyo luotgi wek gujol lok ada?
1 Tika tye lutit kwena mogo me kacokkewu ma gitye ki luotgi ma pe gubedo jo muye? Kace kumeno, ci ngene kene ni lutit kwena magi nongo gimito ni luotgi-ni guribbe kwedgi i woro me ada. Ento man pe obedo mitigi keken. Dano ducu me kacokke gitye ki miti macalo pa Lubanga, ma mito “laro jo ducu, dok mito ni jo ducu gunge lok me ada.” (1 Tem. 2:4) Watwero gudu cwiny luot pa lutit kwena me kacokkewa ma pe gubedo jo muye nining?
2. I yo mene ma niango konyowa me konyo luot ma pe obedo ngat muye?
2 Mukwongo, myero kong waniang lok mogo ki i tam pa ngat ma pe oye-ni. Luot mapol ma pe jo muye giromo maro jo me otgi mada dok gitemme me bedo luot maber ki lunyodo maber ento gitye ki pwony me dinigi mogo ma gigeno ma dok pat ki megwa. Gwok nyo gitye ki ngec manok i kom Lucaden pa Jehovah ma guwinyo ki bot luwotgi mo ma ngeyo wiye wiye nyo jo ma gitye ki adegadega i komwa. Mogo cwinygi wang pi kare ma luotgi tiyo kwede me woro pien yam onongo gitiyo kwede kacel macalo jo me ot. Niango matut bikonyowa me tero ngat ma pe oye i yo me kica ki woro dok wabigwokke pe me nyutu lworo mukato kare ka watye i ka ngete.—Car. 16:20-23.
3. Yo mene maber loyo ma romo ywayo ngat ma pe oye i ada?
3 Nyutu Miti: Yo mukwongo dok maber loyo me ywayo luot ma pe obedo ngat muye me donyo i ada, aye obedo gin ma watimo, pe ki i nywako lok me Baibul. (1 Pet. 3:1, 2) Gin ma pire tek ma kwako yo man aye nyutu miti i kom dano. Lumege me kacokke giromo nyutu miti i kom luot ma pe oye ma dako ki omege i kom ma laco. I yo ma nining?
4. Waromo nyutu miti i yo ma nining?
4 Ka onongo pud peya irwatte ki luot ma pe ngat muye-ni gwok itwero timone inge lok ki luotte ma Lakricitayo-ni. Pe ibed ki cwercwiny ka kong en odok iye i yo ma pe onyutu miti. Liremwa bote ki miti ma wanyutu i kome romo cuko cwinye me neno Lucaden pa Jehovah i yo maber. (Rom. 12:20) Lukricitayo mogo ma guteggi gilwongo ngat mo ma pe oye kacel ki jo me ode me bino ka cam kacel kwedgi, ki miti me ngeyogi maber ki me lweny ki adegadega mo ma gwok gitye kwede. Gunywako lok i kom jami ma luot-ti maro me kaka diyo en me lok i kom jami me cwiny. Lacen, ka luot-ti dong ongi kwedgi ci giromo cako lok i kom Ginacoya. Gwok nyo en romo ye lwongo mo me cito i cokkewa wek enen gin ma dakone tye ka pwonyone, tutwalle ka dong en ngeyo jo mogo me kacokke. Kadi bed ni en pud pe mito kwedo lok ada, omyero kipwoye pi cwak ma en miyo luotte ma oye-ni.
5. Luelda giromo tute me ngeyo ngat ma pe oye i yo ango?
5 Tutwalle luelda myero gutute me ngeyo luot ma pe oye dok gubed ki wang ma twolo me nongo kare me miyo caden. Ngat ma pe oye ma pe ojolo lok me Baibul i kare mukato, romo winyo lok me Ginacoya ma cuko cwiny ka tye i ot yat nyo ka onongo two mo malit. Ka jo me ot ma dinigi opokke woko gukemme ki peko mo, calo to, luelda giromo lwongo ngat ma pe oye-ni me bedo tye ka gitye ka kweyo cwiny jo me ot-ti.
6. Watye ki tyen lok ango me tute me ngeyo luot ma pe guye?
6 Go kong yomcwiny ma Lakricitayo mo me kacokkewa binongo ka luot-te oye ci odonyo i ada! Gin me yomcwiny ma kit meno kelo yomcwiny bot Jehovah, lumalaika ki jo mukene me kacokke. (Luka 15:7, 10) Ento ka ngat ma pe oye-ni pe ojolo ada, pud waromo bedo ma cwinywa yom ni tutewa yomo cwiny Jehovah, ma en “pe mito ni ngat mo orweny woko matwal, ento mito ni jo ducu guo i ningut.”—2 Pet. 3:9.
[Boro buk i pot karatac 6]
Yo mukwongo dok maber loyo me ywayo luot ma pe obedo ngat muye me donyo i ada, aye obedo gin ma watimo, pe ki i nywako lok me Baibul