Ibigamone Ningo?
1. Pingo omyero walub lanen pa Yecu ka ce kipenyowa?
1 Dano pud giuro wa i kare-ni kit ma Yecu obedo ka gamo kwede lapeny ma kibedo ka penyo en kwede. Ka kipenyowa ki lapeny mapat pat i ticwa me pwony, pore mada ni omyero walub lanen pa Yecu i miyo lagam.—1 Pet. 2:21.
2. Ngo ma twero konyowa me miyo lagam matir i kom lapeny moni?
2 Mukwongo Ter Itti: Yecu onongo kong tamo matut i kom tyen lok ma dano moni tye kwede me penyo en. I kine mukene mitte tutwal ni omyero kong iti ki lapeny me niang tam pa dano moni. Ngat ma penyo lapeny calo, “In tika itye ki niye i kom Yecu?” romo bedo ni nongo pe niang gin mumiyo in pe ikwero Karama. Ka iniang tyen lok mumiyo ngat moni openyo lapeny, ci iromo nyamo lok kwede i yo ma konyo.—Luka 10:25-37.
3. Ngo ma tye ma konyowa me nongo lagam ma yengowa ki i Ginacoya?
3 Gam kun Itiyo ki Lok pa Lubanga: Pol kare bedo ber ka watiyo ki Baibul me gamo lapeny. (2 Tem. 3:16, 17; Ibru 4:12) Buk me Reasoning ki “Bible Topics for Discussion” ma tye i New World Translation of the Holy Scriptures gikonyo mada me miyo lagam matir. Kadi bed ni ngat ma openyo lapeny-nyi pe ye i kom Baibul, pud iromo nywako kwede gin ma Ginacoya pwonyo ki diro. Cuk cwiny ngat meno me tero ryeko ma tye i Baibul calo gin ma tye atir. Ka ilubu lanen pa Yecu, ci lagammi bibedo calo “jabu ma kimwono i kom ryal”—ma pire tek, mwonya, dok welle dit.—Car. 25:11.
4. Kare mene ma pe ber me gamo lapeny ducu?
4 Omyero Mono Wagam Lapeny Ducu? Ka pe ingeyo lagam me lapeny moni, lewic pe myero omaki me wacci: “Pe angeyo lagamme, ento atwero kwedo lok i kom lapenyi man ci adwogo ki lagamme.” Mwolo kacel ki mar ma kit meno romo miyo rwod ot ye ni idwog i nino mukene. Ka iniang ni lapeny moni tye ka a ki bot jo ma gitye ki cwiny me adage ma gimito tugo laro lok, lub lanen pa Yecu pe me duru lok mapol. (Luka 20:1-8) I yo acel-lu bene, ka ngat mo ma pe tye ki miti i lok me ada okelo laro lok, juk nywako lok kwede i yo me mwolo kun itiyo ki cawani me yenyo jo ma gitye ki cwiny me winyo lok.—Mat. 7:6.
5. Lanen ango ma Yecu oweko me gamo lapeny?
5 Yecu onongo ngeyo ni jenge i kom Jehovah obedo gin ma pire tek pi cobo ticce me miyo “caden me lok me ada,” ma man kwako gamo lapeny ma nongo kipenyo ki cwiny matir. (Jon 18:37) Pud dong watye ki mot madit atika me lubu lanen pa Yecu i miyo lagam bot jo ma “myero gunong kwo ma pe tum”!—Tic 13:48.