Tit Kwena Kun Ingeyo ni Kare Dong Odic Woko!
1. Paulo omiyo lok me cuko cwiny mene ma myero waket iye cwinywa i karewa-ni?
1 “Tit lok pa Lubanga, cung iye matek.” (2 Tem. 4:2) Pingo lok man me cuko cwiny pa Paulo pire tek i karewa-ni? Lok man twero gudo kwowa ki pa jo mukene nining?
2. Pingo waketo cwinya me yenyo jo ma peya guwinyo kwena maber-ri?
2 Man Gudo Kwo: Dano milion mapol ma i twok lobo-ni pud peya guwinyo kwena maber ma romo miyo ginongo larre. (Rom. 10:13-15; 1 Tem. 4:16) Kitye ka nongo dano mapol ma gitye ki cwiny me ada i wang tic ma kimaro tiyone teretere. Waromo nongo ngat mukene ka ce wadok cen i nino mapat-te nyo i cawa mukene i nino meno. Keto cwinywa i yenyo dano kit man weko cwinywa pe ngoliwa kop nyo wabedo labongo alii me oyo remo.—Tic 20:26.
3. Waromo tic ki cawawa i yo me ryeko nining ka watye i tic me pwony?
3 Kadi bed Lukricitayo me cencwari me acel gurwatte ki tim gero, gin ‘gupongo Jerucalem woko ki pwonygi.’ (Tic 5:28) Tika wan bene wamoko tamwa me ‘miyo caden kore ki kore’? (Tic 10:42) Ka watye i ticwa me pwony, tika watiyo ki cawa i yo me ryeko? Ka ce watye ka kuro jo mukene ma gudok cen ka lim, tika wakwanyo kare me lok ki jo ma gitye ka kato?
4. Tito kwena kun wangeyo ni kare dong odic woko konyowa me bedo ma wakiyo piny nining?
4 Medo Kiyo Pinywa: Kit ma agikki me lobo man dong cok tutwal-li, omyero wabed ma wangwa twolo kun wakiyo piny. (1 Tec. 5:1-6) Ka waloko kare ki kare i kom genwa me Ker-ri, ci paro pi jami me lobo-ni pe bidiyowa. (Luka 21:34-36) Ingeye, ka wakwo ma nino pa Jehovah bedo ‘i wiwa,’ ci bimiyo wamedo cawawa i tic me tito kwena ma laro kwo-ni.—2 Pet. 3:11, 12.
5. Nyutu woro pi kwo cuko cwinywa i ticwa me pwony-nyi nining?
5 Ka watito kwena kun wangeyo ni kare dong odic woko, ci wanyutu ni waneno kwo kit ma Jehovah neno kwede: “En pe mito ni ngat mo orweny woko matwal, ento mito ni jo ducu guo i ningut.” (2 Pet. 3:9; Ejek. 33:11) Dong wamoku tamwa me o bot dano mapol kit ma kerowa twero i wang ticwa, kun man ducu tye pi pako Jehovah!—Jab. 109:30.