Mitte ni Lukricitayo Myero Gulegi
1. Ngo ma mitte wek wacob ticwa me pwony?
1 Pe watwero cobo ticwa me pwonyi ki kerowa. Jehovah miniwa teko me timo tic man. (Pil. 4:13) En tiyo ki lumalaikane me konyowa nongo jo ma gitye calo romi. (Yabo 14:6, 7) Jehovah aye weko kodi me ada ma wapito dok waonyo pii i tere-ni dongo. (1 Kor. 3:6, 9) Pud dong pire tek adada pi Lukricitayo me jenge i kom Wonwa me polo i lega!
2. Omyero waleg pi jami macalo mene?
2 Piwa Kenwa: Omyero waleg kare ducu ma watito kwena. (Ep. 6:18) Omyero waleg pi jami macalo mene? Waromo lega pi bedo ki cwiny maber pi wang ticwa ki dok tekcwiny. (Tic 4:29) Waromo lego Jehovah me telowa bot jo ma gitye ki cwiny matir ma watwero kwano Baibul kwedgi. Ka rwod ot openyowa lapeny mo, waromo lega macek ki i cwinywa kun wapenyo Jehovah me konyowa wek wami lagam matir. (Nek. 2:4) Waromo bene lego pi ryeko wek waket ticwa me pwony-nyi obed gin me acel. (Yak. 1:5) Medo i kom meno, cwiny Jehovah bedo yom ka wapwoye pi mot ma en ominiwa me bedo luticce.—Kol. 3:15.
3. Lega pi jo mukene konyo medde pa tic me tito kwena-ni nining?
3 Pi Jo Mukene: Omyero bene ‘waleg pi luwotwa,’ kun omyero walwong nyinggi ka mitte. (Yak. 5:16; Tic 12:5) Nyo two mono tye ka gengi pe me tito kwena kit ma keroni twero? Ka kumeno, ci leg pi Lukricitayo luwoti ma komgi yot. Pe ica ngo ma legani romo cobone pigi! Pore bene me lega pi luloc wek gubed ki cwiny maber i ticwa me tito kwena-ni, wek omi omegiwa ‘gubed mot labongo ayela.’—1 Tem. 2:1, 2.
4. Pingo omyero wadi cwinywa i lega?
4 Tito kwena maber-ri i twok lobo ducu tye tic mo ma pe waromo cobone ki kerowa kenwa. Ka ‘wadiyo cwinywa i lega,’ ci wabicobo tic man ki kony pa Jehovah.—Rom. 12:12.