Poto Dong Ocek me Akaya
1. Tic ma pire tek ango ma tye ka wot anyim?
1 I nge miyo caden bot dako mo me Camaria, Yecu owaco bot lupwonnyene ni: “Wuting wangwu malo, wunen kit ma dong poto ocek kwede me akaya.” (Jon 4:35, 36) Kayo kac i yo me cwiny onongo tye ka wot anyim, dok Yecu onongo romo neno kit ma tic man biromo kwede lobo ducu i kare me anyim. Yecu pud tye i tic me kac-ci kadi bed en tye i polo. (Mat. 28:19, 20) Ngo ma nyutu ni tic man tye ka medde ameda kit ma tye cok ki agikkine-ni?
2. Ngo ma tye ka timme ma nyutu ni tic me kac i wi lobo ducu tye ka medde ameda?
2 Kayo Kac i Lobe Ducu: I mwaka me ticwa me 2009, wel lutit kwena omedde i wi lobo ducu ki pacen 3.2. I lobe ma kigengo ticwa me pwony iye, welgi omedde ki pacen 14. Ripot me wel lutino kwan me Baibul ma kibedo ka miyone dwe ki dwe okato 7,619,000—ma wel man okato wel lutit kwena mamalo pud dong loyo dok okato wel lutino kwan me mwaka ma onongo okato ki cokcok nucu milion. Kit ma tic man tye ka medde ameda i kabedo mapol, gitye ka medo penyo pi lumiconari. Dano mapol tye ka nonge i wang tic ma kiloko iye leb mapat i lobe mapol. Jehovah tye ka miyo tic man timme oyotoyot i kare me agikki me kac-ci. (Ic. 60:22) In mono itye ki neno mupore i kom “poto” me wang ticwu?
3. Jo mukene gitamo ningo i kom kayo kac i wang ticgi?
3 Kayo Kac i Wang Ticwu: Jo mukene giwacci: “Wang ticwa pe nyako adwogi maber.” Tye ada gire ni wang tic mukene pe nyako adwogi maber calo mukene nyo pe ginyako kit ma nongo ginyako kwede con. Pi man, Lucaden mukene gitamo ni jo ma nongo giromo ye lokwa dong guye woko dok ticgi obedo me coko acel acel mudong. Tika man tye ada?
4. Cwiny ango ma myero wabed kwede i kom ticwa me pwony, dok pingo?
4 Kare me kac obedo kare me tic matek cakke i acakki nio i agikki. Nen kit ma lok pa Yecu man nyutu ni mitte pi oyot: “Kac dwong, ento lutic nok. Pi meno, wuleg Won poto wek ocwal lutic ka kayo kacce” (Mat. 9:37, 38) Jehovah, ma en aye Won poto aye loyo awene ki ka kwene ma adwogi maber myero obed iye. (Jon 6:44; 1 Kor. 3:6-8) Dong tic ango ma wan watye kwede? Baibul gamo ni: “Co kodini i odiko, dok i otyeno bene kit meno pe ijuk cingi ka tic.” (Latit. 11:4-6) Dong, kare me agikki me kac pe obedo kare me juko cingi ki i tic!
5. Pingo myero wamedde ki tito lok ki mit kom i wang tic ma nen calo pe nyako adwogi maber?
5 Medde ki Kayo Kac:Kadi dong kitiyo tyen mapol i wang ticwa dok nen calo dano pe mito winyo lokwa, pud mitte ni wati ki mit kom kun watamo ni kare odic woko. (2 Tem. 4:2) Ayelayela ma tye ka timme i wi lobo i kare-ni weko cwiny dano lokke dok gitamo matut i kom anyimgi. Ka bulu giwoto ki doko jo madongo, gicako winyo ni bedo ki gwok ki dok wic ma opye mot mitte. Medde labongo ilo cingwa romo gudo cwiny jo mukene. Dong, jo ma gukwero winyo lokwa i kare mukato giromo winyone i anyim. Kadi wa jo ma gikwero winyo lokwa akaka myero kicikgi.—Ejek. 2:4, 5; 3:19.
6. Ka tic i wang ticwa pe yot, ngo ma romo konyowa me bedo ki mit kom?
6 Ka tic i wang ticwa pe yot, ngo ma romo konyowa me bedo ki mit kom? Nyo waromo rubo tic i ot ki ot ki yo me pwony mukene, calo miyo caden i kabedo me biacara nyo ki cim. Nyo waromo loko pwonywa wek obed i yo manyen. Waromo loko cawawa wek wanywak i tic me pwony i otyeno nyo i cawa mukene ma nongo dano gitye gang. Watwero pwonyo leb manyen wek water kwena maber-ri bot jo mapol. Waromo medo ticwa me pwony ki tic calo painia marii. Nyo waromo kobo ka ma can lukac tye iye. Ka watye ki cwiny mupore pi tic me kac-ci, wabitute me nywako i tic man kit ma watwero.
7. Myero wamedde ki tic me kac-ci wa awene?
7 Lupwur gitye ki kare manok keken me coko cam ki i poto, pi meno pe giywe wang ma tic otum. Kayo kac i yo me cwiny bene mito kit tam acel-lu. Myero wamedde ki tic me kac-ci wa awene? I kare me “agikki piny,” dok “nio i agikki piny.” (Mat. 24:14; 28:20) Wamito tyeko tic ma kimiyowa calo Latic madit loyo pa Jehovah. (Jon 4:34; 17:14) Pi meno wamedde wunu ki tiyo ticwa me pwonyi ki mit kom, yomcwiny, ki cwiny mupore nio wa i agikki. (Mat. 24:13) Tic me kac-ci pud peya otum!
[Boro buk i pot karatac 2]
Kare me kac obedo kare me tic matek cakke i acakki nio i agikki