Kare me Nipo Obedo Kare me Medo Ticwa!
1. Pingo mitte ni wamed cawawa i tic me pwony i dwe me Marci, April, ki Mai?
1 Tika iromo medo cawani i tic me pwony i kare me Nipo ma tye ka bino-ni? I kabedo mapol piny nongo tye maber pi ticwa-ni. I kabedo mukene lutit kwena mogo gibibedo ki yweyo me cukul nyo dog tic ma giromo tic kwede me nywako i tic me pwony. Cakke i April 2, wabibedo ki rwec ma kite dok pat me lwongo jo ma gitye ki miti me bedo kwedwa i Nipo i April 17. I nge meno wabitute me dongo miti pa jo ma gubedo tye kun walwongogi me bino ka winyo pwony ma kite dok pat ma bibedo i cabit me April 25. Adada, watye ki tyen lok mapol me medo cawa i ticwa i dwe me Marci, April, ki Mai.
2. Watye ki yo acel maber ango me medo cawawa i tic me pwony?
2 Tic Calo Painia pi Tutunu: Yo acel maber adada me medo ticwa aye me bedo painia pi tutunu. Kit ma wan ducu tic omakowa matek-ki, myero waket yubwa con dok walok cawa me ticwa i yo mupore. (Car. 21:5) Gwok nyo iromo nyiko anyim jami mogo ma pigi pe tego tutwal ki i yub me kwoni me nino ducu. (Pil. 1:9-11) Pingo pe itit pi mitini me tic calo painia pi tutunu bot jo mukene me kacokkewu wek inen ka giromo nywako kwedi i yub meno?
3. I yo ango ma jo me ot giromo medo kwede cawagi i tic me pwony?
3 I Otyeno me Woro pi Jo me Ot me cabit manyen, bibedo ber ka wuloko i kom yubwu macalo jo me ot. (Car. 15:22) Ka jo me ot ducu gutiyo kacel, ci giromo konyo jo mogo me otgi me tic calo painia pi tutunu pi dwe acel nyo makato. Kace wunongo ni meno pe twere kono? Ci jo me ot pud giromo keto yub me medo ticgi ki nywako i tic me pwony i otyeno mogo nyo cwalo cawa malac iye i tum pa cabit.
4. Wabinongo adwogi maber ango ka wamedo cawawa i tic me pwony i kare me Nipo?
4 Jehovah gire ngeyo jami ducu ma watimo i ticce dok pwoyowa pi mot ma wamiyo bote. (Ibru 6:10) Wanongo yomcwiny ka wamiyo mot bot Jehovah ki bot jo mukene. (1 Tekwaro 29:9; Tic 20:35) Tika iromo medo cawa me ticci i kare me Nipo man wek inong yomcwiny ki adwogi maber?