Wek Kare me Nipo Man Obed me Yomcwiny!
1. Gin ango ma watwero timone me medo yomcwinywa i kare me Nipo?
1 Tika imito medo yomcwinyi i dwe me Marci, April ki Mai? Yo acel me timo man aye medo cawani i tic me pwony ki ka twere, tic macalo painia pi tutuno. Man bimedo yomcwiny ma itye kwede nining?
2. Medo cawawa i tic me pwony kelo botwa yomcwiny nining?
2 Med Yomcwinyi: Jehovah ocweyowa wek wanong yomcwiny ki i woro en, kun wacobo mitiwa me cwiny. (Mat. 5:3) En bene ocweyowa i yo ma weko wanongo yomcwiny i miyo mot bot jo mukene. (Tic 20:35) Tic me pwony miyo watimo jami aryo magi ducu—waworo Lubanga dok wakonyo jo mukene. Ngene kene ni medo ticci me pwony bimedo yomcwinyi bene. Medo i kom meno, ka wamedo cawa ma wacwalo i tito kwena, ci dirowa bene bimedde. Ka wamedo dirowa, wadongo genwa dok lworo rwenyo woko. Wabibedo ki kare madwong me miyo caden ki me cako kwano Baibul ki dano. Magi ducu weko tic me pwony bedo me yomcwiny.
3. Pingo dwe me Marci ki April bibedo dwe maber pi tic macalo painia pi tutuno?
3 Dwe me Marci ki April bibedo dwe maber pi tic macalo painia pi tutuno pien watwero yero me tic pi cawa 30 nyo 50. Medo i kom meno, nicakke i Ceng Abicel me Marci 22, o kwede wa i kwer me Nipo i Ceng Baraja me April 14, wabinywako i rwec me lwongo dano wek gubin i kwer me Nipo. Kacokke mapol gibibedo ki yomcwiny i tiyo tic man ki “cwiny acel” wek gutyek wang ticgi ducu i kare meno.—Jep. 3:9
4. Ka wamito tic macalo painia pi tutuno, ngo ma myero watim?
4 Cak Yubbe Kombeddi: Ka onongo peya icako yubbe, kwany kare me ngiyo cawa ma itye kwede wek inen alokaloka ma itwero ketone me medo ticci me pwony pi dwe acel nyo makato. Ket pi yub man i lega. (Yak. 1:5) Lok pi yub meno bot jo me otwu ki bot jo me kacokke. (Car. 15:22) In bene ibinongo yomcwiny ma bino pi tic macalo painia pi tutuno kadi bed komi pe yot nyo itye ki dog tic me nino ducu.
5. Wabinongo adwogi maber ango ka wamedo cawawa me tic me pwony i kare me Nipo?
5 Jehovah mito ni luticce gubed ki yomcwiny. (Jab. 32:11) Ka watiyo matek pi medo cawawa i tic me pwony i kare me Nipo, pe wabimedo yomcwinywa keken, ento wabiyomo cwiny Wonwa me polo bene.—Car. 23:24; 27:11.