Ticwa me Pwony—Woto Kacel ki Diyo Cwiny
1. Jehovah onyutu kite me diyo cwiny i kom dano nining?
1 Diyo cwiny obedo kit pa Lubanga ma nen ka maleng i yo ma en tero kwede dano. (Nia 34:6; Jab. 106:41-45; 2 Pet. 3:9) Lanen acel ma pire tek adada i kom kite me diyo cwiny ki mar, kwako tic me tito kwena me Ker-ri i lobo ducu. Jehovah dong odiyo cwinye i kom dano pi cokcok mwaka 2000, kun pud medde ki ywayo jo ma cwinygi atir bote. (Jon 6:44) Ticwa me pwony twero nyuto kit me diyo cwiny pa Jehovah i yo ango?
2. Waromo nyuto kit me diyo cwiny ka watye ka pwony i wang ticwa nining?
2 Tic me Pwony i Ot ki Ot: Walubo lanen me kit pa Jehovah me diyo cwiny ki tito kwena ‘labongo wekone’, i wang tic kama dano pud peya gunyuto mitigi. (Tic 5:42) Wadiyo cwinywa ka wakemme ki miti manok, ngala, ki aunauna i ticwa me pwony. (Mar. 13:12, 13) Wanyutu kit me diyo cwiny i tutewa me yoro pii i te kodi me ada, kadi wanongo ni nongo jo ma gitye ki miti gang tek.
3. Pingo myero wadiyu cwinywa ka watye ka dok cen i lim, ki ka watye ka kwano Baibul ki dano?
3 Kwano Baibul ki Lutino Kwanwa: Dongo gin apita mito kit me diyo cwiny. Watwero pitone maber, ento pe watwero diyone ni odong oyotoyot. (Yak. 5:7) I yo acel-li, dongo i yo me cwiny bene woto motmot dok kore ki kore. (Mar. 4:28) Jo ma wakwano kwedgi giromo nongo ni weko matwal pwony me dini goba, ki kwer me tekwaro tek. Pe omyero watem dongo ada i lutino kwanwa oyotoyot kun wadiyogi me keto alokaloka i kwogi. Omyero wadiyu cwinywa wek wami kare mupore pi cwiny pa Lubanga me tic i cwiny latin kwanwa.—1 Kor. 3:6, 7.
4. Diyo cwiny twero konyowa me gudo cwiny wadiwa ma gipe i niye nining?
4 Wadiwa ma Gipe i Niye: Kadi wamito mada ni wadiwa ma gipe i niye gupwony lok ada, wanyutu ni watye ka diyo cwinywa ka wakuro kare mupore me nywako niyewa kwedgi, kun wagwokke pe me minigi ngec mukato kare woko. (Latit. 3:1, 7) Dong pi tutunu, waweko tic ma watiyo nyuto kitwa ma bino pi lok ada, dok wabedo atera me tito niyewa ki mwolo dok ki woro. (1 Pet. 3:1, 15) Adada, tic me pwony ma woto kacel ki diyo cwiny bigudo cwiny dano dok bene biyomo cwiny Wonwa me polo.