Magajinwa—Kiyubo me Gudo Cwiny Jo Mapat pat
1. Lagwok ot ma lagen dok maryek olubo lanen pa lakwena Paulo nining?
1 Kit ma lakwena Paulo otito kwede kwena maber-ri me gudo cwiny dano kun lubo “kit ducu ma dano gitye kwede,” lagwok ot ma lagen dok maryek bene tiyo ki magajinwa me gudo cwiny dano ma gitye i kwo ki niye mapatpat. (1 Kor. 9:22, 23) Dong me tic maber ki magajin me Wi Lubele ki Awake!, myero waniang dok wiwa opo i kom jo mapat pat ma gibikwano magajin magi.
2. Magajin me Awake! kiyubo me gudo cwiny jo ma nining?
2 Awake!: Kiyubo magajin man me gudo cwiny jo ma kwogi rom aroma ki pa jo ma lakwena Paulo oloko botgi kun cako lokke ni “wun jo Atene.” (Tic 17:22) Co meno onongo pe gitye Lukricitayo, dok gitye ki niang manok i kom Ginacoya. I yo acel-lu, jo ma kiyubo magajin me Awake! pigi me akwana, ngecgi i kom Baibul tye manok nyo peke olu. Oromo bedo ni gitye labongo ngec mo keken i kom pwony pa Lukricitayo, nyo gwok pe gigeno lok i kom dini, dok pe gingeyo ni lok me Baibul tye me kony dok kette i tic. Tyen lok mukwongo me magajin me Awake! aye me weko ni jo ma gibikwanone guye ni Lubanga me ada gire tye. Dok bene pire tek me dongo niye i kom lok ma tye i Baibul ki me konyo ngat ma bikwanone me niang ni Lucaden pa Jehovah dok gipat ki gurup me dini mukene-ni.
3. Magajin me Wi Lubele kiyubo me akwana pi angagi?
3 Wi Lubele: Jo ma gibikwano magajin man ma kiyubo pi lwak-ki, aye jo ma gitye ki woro pi Lubanga ki pi Ginacoya. Gitye ki ngec i kom Baibul ento pe giniang pwony ma iye matir. Girom aroma ki lwak ma Paulo owacci gin jo ma ‘gilworo Lubanga.’ (Tic 13:14-16) Magajin me Wi Lubele me akwana pi kacokke, kiyubo mukwongo pi Lucaden pa Jehovah. Paulo onongo ngeyo ni jo ma gibikwano waragane gingeyo Ginacoya dok gingeyo lok me ada. (1 Kor. 1:1, 2) I yo acel-lu, pwony me anyama ma gitye i Wi Lubele kiyubogi pi jo ma ginywako i cokkewa dok giniang maber lok ki tam ma Lucaden gitiyo kwede.
4. Pingo mitte ni wabed ki ngec i kom lok ma tye i magajin acel acel ma waterogi i tic me pwony?
4 Kadi bed ni pol kare wapoko magajin ki aryo aryo, wanyutu acel keken i kingi ka watye ka cako lok. Ci dong mitte ni iket yub me ngeyo lok ma tye i magajin magi maber. Man bimiyo ibedo ma iyubbe me pwony i yo ma gudo cwiny jo ma irwatte kwedgi.