Jehovah Tye ka Pwonyowa me Timo Tic Man
1. Ka Jehovah omiyo tic ki dano, gin ango mukene ma en timo?
1 Ka Jehovah omiyo tic ki dano, en bene miyo botgi kony ma mitte pi cobo ticgi maber. Me labolle, i kare ma Jehovah otito ni Nua oger yeya madit, Nua onongo peya otimo tic meno, En otito bote kit me timone. (Acak. 6:14-16) I kare ma kimiyo tic ki Moses ma lakwat ma mwol-li me cito bot ludito me Icrael ki bot Parao, Jehovah ocikke bote ni: “Abibedo ki dogi, abipwonyi ki gin ma ibiloko.” (Nia 4:12) Tito lok me kwena maber-ri aye obedo tic ma kimiyo botwa me atima, Jehovah omiyo kony ma mitte me tiyo tic man. En tye ka pwonyowa me timo tic man kun tiyo ki Cukul me Tiokraci ki Cokke me Ticwa. Adwogi maber ango ma wanongo ki i pwonye man?
2. Waromo nongo ber pa Cukul me Tiokraci nining?
2 Cukul me Tiokraci: Kwan yub ducu ma kiketo ma peya icito i cokke. Ka latin kwan moni tye ka miyo pwony, temme me neno kit ma en oyubo kwede pwony meno, ki kit ma en tiyo kwede, ci niangoni i kom kit me pwony bimedde. (Car. 27:17) Kel bukki me Ministry School pien meno aye obedo buk ma ibitic kwede pi cokke. Ka lador wi cukul tye ka miyo tira ki latin kwan kun tiyo ki buk man, in bene itwero ngolo te coc ma itamo ni ibitic kwede, dok iromo coyo coc mo manok i teng buk kenyo. Ento, yo maber loyo me nongo adwogi mabeco ki i cukul man, aye ka wanywako i yub man. In dong idonyo i cukul? Ka kimini karatac me miyo pwony i cukul, yub maber dok iket i tic tira ma ibinongo. Ka itye i tic me pwony, ti ki jami ma ipwonyogi-ni.
3. Gin ango ma bikonyowa wek wanong adwogi maber i Cokke me Ticwa?
3 Cokke me Ticwa: Wiwa bipo i kom pwony mabeco ma kimiyo i cokke man ka wakwano jami ma kiyubo pi cokke meno con kun wayubbe bene me nywako i pwony ki leyo tamwa. Ka waloko macek cek, waweko kare ki jo mukene bene me waco tamgi. Ket tammi i lapor ma kiyubo, dok iti ki tam ma inongo rwatte maber pi ticci me pwony. Gwok kopi me pwony mogo me Ticwa Me Ker ma bikonyi i kare me anyim.
4. Pingo omyero wati maber ki yub me pwony ducu ma Lubanga miyo?
4 Calo tic ma kimiyo bot Nua ki Moses, ticwa me tito kwena maber-ri i lobo ducu obedo tic matek adada. (Mat. 24:14) Watwero timo tic man maber ka wajenge i kom Jehovah, Lapwonywa Madit, ki keto i tic pwony ducu ma wanongo ki bote.—Ic. 30:20.