Cukul me Tiokraci pi Mwaka 2015 Konyowa me Dongo Dirowa me Pwony

¹ Daudi ocoyo i Jabuli ni: “Mi lok ma a ki i doga ki tam ducu ma tye i cwinya obed ma in ipwoyo, ai Rwot [Jehovah], in gotta dok lakokka.” (Jab. 19:14) Wan bene wamito ni lokwa obed ma yomo cwiny Jehovah pien watero mot ma en omiyo botwa me tito lok me ada i kacokke ki i tic me pwony calo gin ma pire tek adada. Cukul me Tiokraci obedo yo acel ma Jehovah pwonyowa kwede me tito kwena maber-ri. Pwonnye man timme i cabit ducu i kacokke ma kato 111,000 i twok lobo ducu. Okonyo omege ki lumege me lobe ducu ma gia ki i kit kwo mapatpat me doko lutit kwena mucwiny, kun gipwonyo ki diro, dok ki tekcwiny.​—Tic 19:8; Kol. 4:6.

² Yub me cukul pi mwaka 2015 bibedo ki wi lok ma kinyamogi i “An Introduction to God’s Word” (“Layab Lok me Baibul”) ki “Glossary of Bible Terms” (“Nyig Kwayilok me Baibul”) ma nonge i New World Translation, kacel ki lok ma tye i bukke me Baibul Pwonyo ki Lapwony Madit. Medo i kom meno, kiketo alokaloka i cawa ma kimiyo pi pwony me wi lok madongo ma kikwanyo ki i Baibul ki Pwony Nam. 1. Alokaloka magi kacel ki ngec ma kimiyo me aluba i cukul kinyamogi i paragraf ma piny kany.

³ Wi Lok Madongo ma Kikwanyo ki i Baibul: Omege ma kimiyogi pwony man myero guti ki dakika aryo me nyamo ginacoya acel ma nongo kikwanyo ki ka ma kikwano i Baibul pi cabit meno, dok ma rwatte ki kwowa me kareni. Yubbe maber bikonyo omege magi me nyamo lok ma twero konyo kacokke i wang cawa ma kiminigi. I nge meno, lwak me kacokke gibibedo ki dakika abicel me miyo lok pi cekon 30 nyo ma pe o i kom gin ma gin bene gunongo ni ber i karegi me kwano Baibul. Yubbe maber mitte ka wek wami lagam i cekon 30 keken, ento timo kit meno obedo pwonye maber piwa. Meno weko bene kare pi jo mukene me miyo lagam i kom jami ma gupwonyo.

⁴ Pwony Nam. 1: Cawa ma kimiyo pi kwano Baibul dong kidwoko tye pi dakika adek nyo ma pe o dok kibikwano gin manok. Jo ma kiminigi pwony man myero gubed ka nwoyone tyen mapol kun gikwano ki dwan malongo dok giketo cwinygi i kom kwano kwan mapwot wek lokgi oniange maber. Lutic pa Jehovah ducu myero gutute me kwan maber, kit macalo kwan obedo gin ma pire tek i worowa. Cwinywa pud dong yom ni pol pa lutinowa gikwano maber! Wapwoyo lunyodo pi tutegi me konyo lutinogi me kwan maber.

⁵ Pwony Nam. 2: Pwony man bibedo pi dakika abic dok kibimiyone bot lumege. Latin kwan myero oti ki wi lok ma kimiye. Ka pwony man a ki i New World Translation, myero kiwek obed macalo but tic me pwony ma rwatte ki kwo me wang ticwu. Ka kikwanyo pwony man ki i buk me Lapwony Madit, ci latin kwan omyero oyeny gin me apwonya ma mako wi lokke, oyeny ginacoya mupore, dok onyut gin ma wapwonyo ki iye. Kiromo medo ginacoya mukene ma kubbe ki wi pwony meno. Lador wi cukul myero ocim ngat mo me konyo kor latin kwan man.

⁶ Pwony Nam. 3: Pwony man bibedo pi dakika abic dok omyero kimi bot omego nyo lamego. Ka kimiyo bot lamego, ci omyero kimi kit ma kimiyo kwede Pwony Nam. 2. Ka kimiyo bot omego pwony ma jenge i buk me Baibul Pwonyo, ci omyero en oyub pwony man kun ngeyo ni ebimiyone atir bot lwak. Latin kwan myero omi pwony ma lubbe ki wi lokke, oyeny ginacoya mupore, dok onyut gin ma wapwonyo ki iye.

⁷ Gin Manyen i Pwony Nam. 3 pi Omege: Ka kimiyo pwony ma jenge i New World Translation bot omego, ci en omyero omi pwony man macalo lapor i kom woro pi jo me ot nyo tic me pwony. Pol kare, lador wi cukul aye myero ocim ngat ma bikonyo kor latin kwan man ki kit ma pwonye myero obed kwede. Ngat ma konyo lami pwony myero obed dano me otte nyo omego mukene me kacokkegi. En romo tic ki ginacoya mukene ma rwatte ki wi pwony ma en tye ka lok iye. Kare ki kare, kibimiyo pwony man bot laelda. Laelda romo yero ngat ma bikonyo kore ki kit ma pwonye myero obed kwede. Labongo akalakala mo, bibedo me cuko cwiny bot lwak me kacokke me neno luelda ka ginyuto diro me pwony kacel ki dano me otgi nyo omego mukene.

⁸ Nyuto ka ma Mito Ayuba: Lador wi cukul bitic ki dakika aryo i nge pwony pa latin kwan acel acel me miyo pwoc ki tito ka ma mito ayuba kun nongo tiyo ki buk me Benefit From Theocratic Ministry School Education. Ka lador wi cukul tye ka lwongo latin kwan moni i wi abam, en pe myero otit diro me lok ma latin kwan bitic iye. I nge pwony pa latin kwan acel acel, lador wi cukul myero omi pwoc, otit diro me lok ma latin kwan otiyo iye, dok otit gin mumiyo latin kwan omiyo pwonye maber, nyo otit ki kica ka ma myero latin kwan oyubbi.

⁹ Fom me ka ma mito ayuba nonge i pot karatac 79 me o i 81 i buk me Ministry School. Ka latin kwan dong otyeko miyo pwonye, lador wi cukul myero ogwet buk pa latin kwan dok openy latin kwan ka otimo peny ma tye i diro me lok ma kimine. Kitwero miyo pwoc kacel ki tam mukene ma tye me kony bot latin kwan i nge cokke nyo i nino mo mukene. Miti ma kinyuto i kom latin kwan acel acel me cukul myero kinen calo kare me konyo latin kwan meno me medde anyim ki dongo.​—1 Tem. 4:15.

¹⁰ Ka pwony pa latin kwan moni okato cawa, ci lador wi cukul nyo lakony kore myero obed atera me jukone, kun tiyo ki olang nyo dwongo ka mo, me nyuto ni cawa pa latin kwan-ni otum woko. Latin kwan myero oniang ni cawane otum kun giko lokke cutcut ci a woko ki i wi abam.​—Nen buk me Ministry School, pot 282, para. 4.

¹¹ Kicuko cwiny jo ducu ma gupore ni myero gudony i Cukul me Tiokraci. (Nen buk me Ministry School, pot 282, para. 6.) Pwonye ma wanongo ki i cukul man okonyo jo pa Jehovah me tito ki pwonyo kwena maber me Ker-ri ki tekcwiny, woro, ki mar. Labongo akalakala mo, cwiny Jehovah yom me nongo pak ki bot jo ducu ma ginongo ber pa cukul man!​—Jab. 148:12, 13; Ic. 50:4.