Yubbe Kombeddi Me Medo Ticci Me Pwony
1. Gin ango ma pire tek ma kwako kare me Nipo dok waromo yubbe pire nining?
1 Kare me Nipo miyo botwa kare maber me ‘miyo pwoc bot Jehovah ki dwan malongo.’ (Jab. 109:30) In mono ibimedo ticci i dwe me Marci macalo yo acel me nyutu pwoc bot Lubanga, Ngat ma omiyo ginkok-ki? Man obedo kare maber me keto yub wek icob miti meno.—Car. 21:5.
2. In kacel ki lutit kwena mukene mono wuwinyo nining i nge niang pi yub ma kiketo me dwoko piny cawa ma mitte me tic calo painia pi tutunu i dwe me April me mwaka mukato-ni?
2 Tic Calo Painia pi Tutunu: I mwaka mukato-ni, kacokke mapol gubedo ki yomcwiny adada i kare ma guwinyo pi yub ma kiketo me dwoko piny cawa ma mitte me tic macalo painia pi tutunu i dwe me April. Omego mo acel ocoyo ni: “Kit ma pud atye i cinia, ma naka peya anongo kare me tic macalo painia marii. Ento dong abipongo fom pi cawa 30 man kun atute matek bene me tic pi cawa 50 i dwe me April.” Lamego mo acel ma tiyo i dog tic ka ma cwalo iye cawa odiko wa otyeno cok jwijwi ocoyo ni: “Cawa pyeradek—meno gin ma cobone yot!” I kare ma kimiyo lok angeya man, lamego mo acel ma kong otiyo calo painia, ma dong tye ki mwaka 80 owacci: “Man aye kare ma abedo ka kurone kikome! Jehovah ngeyo ni kare ma atiyo calo painia-ni obedo kare maber loyo i kwona!” Jo mukene ma pe gutwero tic calo painia pi tutunu guketo yubgi me medo cawa me ticgi me pwony.
3. Watye ki tyen lok ango me tic calo painia pi tutunu i dwe me Marci, April, ki Mai?
3 I dwe me Marci me mwaka manyen, yub dok bibedo tye me tic calo painia pi tutunu pi cawa ma romo 30 ki wiye. Medo i kom meno cakke i Ceng Abicel me Marci 17 wabibedo ki rwec ma kite dok pat me lwongo dano me bedo tye i Nipo me April 5. Lutit kwena mapol gibinongo yomcwiny madit adada pi medo cawa ma gicwalo i tic me pwony, ci bitugo miti me medde ki tic calo painia pi tutunu i dwe me April ki Mai kun gicobo cawa 50 ma mitte-ni.
4. Waromo medo cawa ma wacwalo i tic me pwony nining, dok man kelo adwogi ango?
4 Wek yub me medo cawa ma ngat acel acel cwalo i tic me pwony ocobbe kakare, pingo pe wunyam kit me konyo ngat acel acel, kacel i otyeno me Woro pi Jo me Ot? (Car. 15:22) Wuleg Jehovah wek ogo laane i kom tutewu. (1 Jon 3: 22) Medo cawa ma wucwalo i tic me pwony bidongo pwocwu pi Jehovah dok bene bimedo yomcwinywu.—2 Kor. 9:6.