Wugwokke ka Wutye i Tic me Pwony
1. Pingo bedo ki ryeko mitte i ticwa me pwony?
1 “Macalo romi i kin orudi,” lutic pa Lubanga gitye ka pwony “i kin lwak jo me kare-ni ma guballe woko-ni.” (Mat. 10:16; Pil. 2:15) Ripot maraco i kom lweny i kin jo me lobo moni, tim gero pa lwak, ki mako dano tektek onya ka ducu, man obedo lanyut ni jo maraco gitye ka medde ki “bedo marac makato kare.” (2 Tem. 3:13) Lok me Ginacoya mene ma ka waketo i tic bikonyowa me ‘bedo ryek’ i ticwa me pwony?—Mat. 10:16.
2. Jami ango ma twero miyo ia woko ki i wang tic moni ci imedde ki tito kwena ka mukene?
2 Bed ma Wi Tiyo: Carolok 22:3 loko i kom ryeko ma tye i “kanne” ki i kom gin marac. Bed ma wangi twolo! Kadi kabedo ma pol kare piny okwe iye mot romo lokke atura. Iromo neno ka wel abili woto ki medde nyo nongo lwak tye ka cokke i dye gudo. I kare mukene rwod ot ma lakica twero cikki woko con ka peko tye. Me kaka galle i kabedo-no pien imito ngeyo gin ma tye ka timme, bedo me ryeko ka ia woko cutcut ci imedde ki tic ka mukene.—Car. 17:14; Jon 8:59; 1 Tec. 4:11.
3. Lok ada ma tye i Latitlok 4:9 tiyo nining ka watye i ticwa me Ker?
3 Wuti Kacel: Latitlok 4:9 wacci: “Bedo jo aryo ber kato ma dano acel obedo kene.” Kadi bed ni pol kare itiyo keni i tic me pwony ma gin mo marac pe timme i komi, ento kombeddi tika pinye ber ma weko itwero tic keni? I kabedo mukene, pinye gire ber. Ento i kabedo mukene, pe oporre pi lamego, nyo ngat ma tidi me tic i ot ki ot kene, tutwalle ka ceng dong opoto. Dong otyeko nen ni tic ki ngat mukene ma bedo ma wange bit pire tek adada. (Latit. 4:10, 12) Wubed ma wangwu twolo kun wuparo pi lutit kwena me gurupwu. Wek obed kiti me miyo ngec bot jo mukene ka itye ka a ki i wang ticwu.
4. Waromo tic ki miti me gwoko jo ducu me kacokkewa nining?
4 Macalo jo ma ‘gigwokowa,’ luelda aye gitye ki tic me miyo tira ma tiyo ma lubbe ki kwo me kabedogi. (Ibru. 13:17) Wangeyo ni Jehovah bigoyo laane i komwa ka wanyuto mwolo macalo Lukricitayo dok walubo tira pa luelda. (Mika 6:8; 1 Kor. 10:12) Walego ni lutic pa Lubanga ducu guribbe i miyo caden maber i wang ticwa, kun nongo wagwokke kare ducu.