Wuyeny Jo ma Giloko Leb Mukene, ci Wutit Kwena Botgi
1. Wang tic pa kacokke ka ma kiloko iye leb mapol pingo kipoko iye i yo ma lubbe ki leb mapat pat?
1 I nino me Pentekote 33 K.M., i nge nongo cwiny maleng, lukwena pa Yecu “gucako dumo [loko] leb mukene mapatpat” bot jo ma gua ki i but lobo mapatpat ma onongo gitye kunu. (Tic 2:4) Macalo adwogine, dano ma romo 3,000 gunongo batija. Tye me ur ni, nen calo jo mapol i kin welle magi onongo bene giloko leb ma rom aroma calo leb me Ibru nyo Grik. Ento Jehovah omiyo guwinyo kwena me Kerri i lebgi. Ngene kene ni tyen lok mumiyo meno otimme aye ni dano pol kare gijolo kwena maber-ri ka guwinyo i lebgi. Pi meno , i kareni, wang tic pa kacokke ka ma dano loko iye leb mapol, kipoko iye i yo ma lubbe ki leb mapatpat ma kiloko.—Nen Organized, pot. 107, para. 2-3.
2. (a) Tic me yenyo jo ma giloko leb mukene-ni obedo ngo, dok bimitte awene? (b) Kacokke mapat pat giromo konyo luwotgi i tiyo wang tic ka ma kiloko iye leb mapol nining? (c) Waromo timo gin ango ka wanongo ngati mo ma loko leb mukene tye ki miti?
2 Ka wabedo ka ma dano ducu giloko iye leb acel, wuromo mere tito kwena kun wua ki i ot acel wucito i mukene. Ento, meno oromo bedo pat ka wubedo i wang tic ka ma dano loko iye leb mapol. Kacokke me leb mukene bene giromo bedo ka tito kwena i wang tic acel-lu. Kadi bed kacokke mukene-ni gitwero miyo boti ngec i kom jo ma ginongo ma giloko leb mukene, tic me nongo jo ma giloko leb mukene ocung tutwalle i kom kacokke nyo gurup me leb meno. (Nen bok me, “Wumi Kony bot Lutit Kwena Luwotwu.”) Pi meno, oromo bedo ni myero wukony ki yenyo jo ma giloko leb mukene. Tic me yenyo jo meno mono twere nining?
3. Ngo ma bikonyo kacokke nyo gurup moni me yenyo jo ma giloko leb mukene, ki me moko cawa ma myero gucwal i tic meno?
3 Yubbe pi Yenyo Jo ma Giloko Leb Mukene: Wel cawa ma kibicwalo i yenyo jo ma giloko leb mukene i wang tic ma dano loko iye leb mapol, bilubbe ki kit dano kacel ki kwo ma tye i kabedo meno. Me lapore, waromo penye ni: tye dano adi mono ma giloko leb meno? Lutit kwena mono gitye gin adi? Kacokke nyo gurup mono dong onongo ngec i kom paci adi ma gitiyo ki leb meno? Pe mitte ni kacokke ongi odi weng ki acel acel, ento giromo yero kabedo ka ma dano ma giloko leb meno gidwong iye ki i wang ticgi nyo i kabedo muromo wang ticgi. Ento, bedo ki yub maber pi yenyo jo ma giloko leb mukene, pire tek wek jo ducu ma wanongo gunongo yomcwiny me lwongo nying Jehovah.—Rom. 10:13, 14.
4. (a) Yub ango ma myero kiket me yenyo jo ma giloko leb mukene? (b) Yo ango ma waromo tic kwede me nongo jo ma giloko leb mukene?
4 Wek tic meno owot maber labongo kacokke nyo gurup moni nwoyo tic pa lawote, Luelda, tutwalle ngat ma neno wi tic me pwony myero oyub dok odor tic me yenyo jo ma giloko leb mukene-ni. (1 Kor. 9:26) I gurup ma gitiyo ki leb mukene, luelda me kacokke ma gurup-pi obedo bute gibiyero omego mo ma laelda nyo lakony kor tic, me doro tic meno. Kacokke ki gurup mapol me lobe mukene, gitye ki yub me nongo ngec i kom jo meno, calo tic ki direktori ma nyuto kabedo pa ngat moni ki namba cimme, nyo ki Intanet kun gineno nying ma rwatte ki pa jo ma giloko leb moni. I ngeye dong gimedde ki yenyo kun gigoyo cim botgi nyo gilimogi me niang ka ce mitte ni kiketgi i kin jo me wang tic me kacokke meno. Ka ce twere, luelda me kacokke moni ma gineno wi gurup mo giromo keto yub wek kacokke olu gunywak kare ki kare i tic me yenyo jo ma giloko leb mukene.—Nen bok me “Kit me Nongo Jo ma Giloko Leb me Kacokkewu nyo Gurupwu.”
5. (a) Yo mene ma kimiyo me konyo lutit kwena ki tic me yenyo jo ma giloko leb mukene? (b) Lok ango ma watwero nywakone ki dano ka watye i tic meno?
5 Myero wabed ki tyen lok matir kare ducu ka watye ka nywako i tic me yenyo jo ma giloko leb mukene. Kit macalo tic man tye but ticwa me pwony, omyero warukke i yo mupore. Jo mapol ginongo ni poro kit me pwony i leb meno kare ki kare, ki tito kwena iye bene konyowa ki lok ki mit kom kun dongo dirowa me loko leb meno. Waromo kwano cawa ma watero i yenyo jo meno i ripotwa me tic me pwony, ento pe wakwano cawa ma watero i goyo mep me nyuto wang tic, nyo i ryeyo nying jo ma wanongo ma giloko leb meno. Ka wanongo ngat ma loko leb meno myero watute me nywako kwede kwena maber-ri, ci i ngeye watito bot lanen wi tic me pwony nyo ngat ma en ocimo wek ngec meno bene kimed i wi rekod me wang ticwu. Pire tek ni wutim man kadi bed ni ngat meno onyuto miti nyo pe. Kadi bed ni tic me yenyo jo meno pire tek adada, myero wabed ki neno mupore dok wanywak i tic me pwony mukene-ni bene.—Nen bok me “Gin ma Myero Kiloki i Tic me Yenyo Jo ma Giloko Leb Mukene.”
6. Peko ma kite dok pat ango, ma yenyo ludingit twero kelone?
6 Yenyo Ludingit: Yenyo ludingit tye ki peko ma kite dok pat kun mito tute matek ki diyo cwiny. Ngat ma ladingit pe twero ngene ki nying ma kikwano akwana, nyo ki kit ma dul kome gwok nen kwede, nyo ki bongo ma en ruko. Medo i kom meno lupacogi ki luremgi guromo bedo ki lworo kun gigwokke ki miyo ngec i kom ngat ma kit meno bot lutit kwena ka ce gupenyo. Ngec man ma kwako yenyo ludingit twero bene bedo me kony ka watye ka yenyo jo ma giloko leb mukene.
7. (a) Ngec ango ma kitwero nongone i wang ticwa ma dok i kom ludingit? (b) Waromo kweyo cwiny rwod ot ma tye ki akalakala nining?
7 Kacokke ki gurup pa jo ma giloko leb pa Ludingit gitye ka nongo adwogi maber i kabedo mapat pat. Oromo bedo ni rwod ot moni oneno ka jiranine, latic lawote nyo latin kwan lawote tiyo ki leb pa ludingit. Oromo bedo ni tye lanyut mo ma nyuto ni kabedo moni tye ki ludingit. Ngat mo gwok tye ki wat ma ladingit. Nge ni, kitwero neno tyen lok me limowu ki akalakala. Ento wuromo tute me tero rwod ot i yo me lirem kun wuloko i yo ma kweyo cwinye, dok watito bote tyen lok me lime ki woro. Jo mogo gunongo adwogi maber i nge nyuto Baibul nyo DVD me leb pa ludingit bot rwod ot ka giwoto ki penyo ka en ngeyo ngat mo ma ladingit. Ci dong giwaco ni gimito nywako lok me Baibul ki ludingit. Ka rwod ot pud lworo miyo ngec i kom ngat ma kit meno, ci oromo ye gamo lwongo me bino i cokkewa nyo ngec mo i kom ka ma wabedo iye, wek omi bot ladingit ma watte nyo lareme-ni.
8. Kacokke me leb mukene ma tye cok gitwero konyo kacokke me leb pa ludingit nining?
8 Pi nino acel nyo aryo mwaka ki mwaka, kacokke pa jo me leb pa ludingit twero penyo kacokke me leb mukene ma tye cok kwedgi me konyogi ki yenyo ludingit i boma mogo ma tye i wang ticgi malac-ci. Kacokke me leb pa ludingit aye gibidoro cokke me cito ka tic man kun gimiyo ngec i kom kit ma ticce biwot kwede kacel ki lapor acel. Gurup acel acel twero wot ki latit kwena acel me kacokke me leb pa ludingit dok kimiyo botgi mep ma nyuto kabedo ma myero guyeny ludingit iye.
9. Tic me yenyo ludingit-ti twero wot nining i kabedo ma gigure iye pi nywako lirem, galowang, nyo me nongo kony ma gamente miyo botgi?
9 Yenyo ludingit bene twere ka ma ludingit gimaro gure iye pi nywako lirem, galowang, nyo me nongo kony ma gamente miyo botgi. Lutit kwena myero guruk bongo mupore ki yub ma nongo jo meno gitye kwede. Bedo ber ka kiloko ki dano acel nyo aryo ma gitye kunu, dok me timone i mung, me kaka lok ki gurup olu. Ka lokwu owoto maber ci wuromo miyo ngec i kom ka ma wutwero rwatte iye lacen.
10. Lutit kwena giromo yenyo ludingit i kabedo me biacara nining?
10 Yo mukene maber aye me yubo mep ma nyuto kabedo me biacara, ki limogi i cawa ma rwatte. Mep acel twero bedo ki ka piko mo mogo. Mukene giromo nyuto ka kwoyo bongo, ka cam, otel, ki biacara mukene-gu. Ka mep acel acel tye ki nying biacara magi, ci lutit kwena giromo tic kwede me nongo ngec ki diro. Me lapore, kit macalo i kine mukene ludingit gibedo i otel, waromo miyo bot lutic me otel ngec i kom ticwa kun watiyo ki DVD pa ludingit kacel ki karatac mo me lwongo dano i cokkewa, wek gumi bot ladingit mo keken ma welogi. I biacara mukene, waromo penyogi ka laticgi mo nyo luwilgi gitiyo ki leb pa ludingit. Ka cukul pa ludingit mo tye i wang ticwu, wuromo miyo botgi DVD ma watye kwede pi ludingit.
11. Tic me yenyo dano-ni obedo but tic me pwony ma pire tek pingo?
11 Tic Ma Pire Tek: Nongo rwod ot ma giloko leb me kacokkewu romo bedo tek. Medo i kom meno, wang tic moni twero lokke oyotoyot pi kobo nyo bino pa dano, ma weko gwoko rekod bedo tek. Ento, i kabedo mapol tic me yenyo jo ma giloko leb mukene obedo but tic me pwony ma pire tek. Jehovah, ma omiyo botwa tic man pe poko kin dano. (Tic 10:34) En mito “laro jo ducu, dok mito ni jo ducu gunge lok me ada.” (1 Tem. 2:3, 4) Dong pi meno, myero wati kacel ki Jehovah, i tic me nongo dano me leb ducu ma gitye ki “cwiny ma genne ki maber.”—Luka 8:15.
[Bok i pot karatac 5]
Wumi Kony bot Lutit Kwena Luwotwu
Ka kacokke nyo gurup moni gimito kony me yenyo jo ma giloko leb mukene ma gitye i wang ticgi, lanen wi tic me pwonygi twero lok ki luelda me kacokke me leb mukene ma tye cok. Bedo ber loyo ka kipenyo kacokke ma tye cok, nyo ma tye ki dano mapol ma giloko leb meno. Kacokke ma kipenyogi-ni giromo niango lutit kwenagi ni ka gunongo ngat mo ma loko leb meno, ci myero guco nying kabedone piny dok gumi bot lanen wi tic me pwony, ka en bimiyone bot kacokke ma tye ka penyo pi kony-nyi. Lunen wi tic me pwony me kacokke magi gibitic kacel me keto yub me cobo wang tic ka ma dano loko iye leb mapol dok gibikonyo jo ma gitye ki miti me cito i kacokke nyo gurup mupore pigi. Ka lutit kwena gunongo ngat mo me leb mukene ma nen ka maleng ni tye ki miti (nyo ladingit mo), cutcut myero gupong fom me Please Follow Up (S-43) ci gumi bot karan me kacokke. Man bikonyo wek ngat ma tye ki miti-ni onong kony oyotoyot.—Nen km 5/11 pot. 3.
[Bok i pot karatac 6]
Kit me Nongo Jo ma Giloko Leb me Kacokkewu nyo Gurupwu
• Peny jo mukene—Lutino kwan me Baibul, jo me pacogi, lutic luwoti, ki mukene.
• Ti ki direktori ka tye, me nongo nying ma kitiyo kwede i leb meno. Direktori ma tye ki nying ki kabedo pa dano twero nonge i Intanet nyo ki bot lucat lain cim.
• Nong ngec ki diro ki i kabedo mogo calo laibrari, opic pa gamente, ki gang kwan madito.
• Pi ngec mukene ma kwako kabedo ma lwak gure iye nen karatac me akwana pi lok angeya i kom kabedo ma kiloko iye leb mukene.
• Lim dukan ki biacara ma tiyo pi jo ma giloko leb mukene.
• Lok ki jo ma gitye ki twero wek guye ni iket meja me nyuto bukkewa i kabedo me biacara, univaciti, nyo ka ma kikuru iye bac kun iwoto ki yenyo jo ma giloko leb mukene.
• Ka ce cik ye, wil direktori me biacara nyo kompiuta ma twero nongo ngec mogo ki i Intanet.
[Bok i pot karatac 7]
Gin ma Myero Kiloki i Tic me Yenyo Jo ma Giloko Leb Mukene
Lok i yo me lirem, ki ada twero gengo akalakala. Romo bedo me kony ka kong kinyuto bukke ma tye i leb pa ngat meno.
I nge motte, iromo wacce ni: “Watye ka yenyo jo ma giloko leb ․․․․․ wek wanywak lok kwedgi i kom gen ma tye i Baibul. In mono ingeyo dano ma kit magi?”
Ka wutye ka yenyo ludingit, wuromo wacci: “ Apwoyo ba. Amito nyutti gin moni. [Ci iti ki vidio ka ce tye me nyuto pwony mo ma tye i Baibul me New World Translation—ma kiketo i DVD.] Man obedo but Baibul i leb pa ludingit me Amerika. Medo i kom meno, watye bene ki vidio mapol ma wamiyo bot dano labongo cul mo, ma twero cobo miti me cwiny pa ludingit. Tika ingeyo ngat mo ma ladingit nyo ma pe winyo lok maber ma tiyo ki leb pa ludingit?” Ka rwod ot wiye pe po i kom ngat ma kit meno iromo lok i kom kabedo mogo ma gwok twero bedo ki ludingit, calo i dog tic, i cukul, nyo bot jiranine.