Dongo Wang Tic ma Kiloko Iye Leb Mukene
1. Ngo ma warwatte kwede ka watye ka nywako i tic me tito kwena i wang ticwa?
1 Yecu Kricito otito-ni lok man me kwena maber-ri kibititone i lobo ducu “me bedo caden bot rok ducu.” Lok magi tye i wi latit kwena acel acel ma nywako tic me pwony ki tito kwena-ni. (Mat. 24:14; 28:19, 20) Ka watye ka tito kwena ki loko dano me doko lupwonye, warwatte ki dano me rok mapat pat ma giloko leb mapat ki mewa. Jo magi bene gupore me winyo kwena me Ker-ri ki cung pi lok me ada ma peya nino pa Jehovah ma kelo lworo-ni oromo. (Mal. 3:18) Dong wan watwero dongo wang ticwa ma kiloko iye leb mukene nining?
2. Waromo poro Jehovah nining ka watye ka lok bot jo ma giloko leb mukene?
2 Bed ki Neno pa Jehovah i kom Jo ma Giloko Leb Mukene: Me nyutu mar pa Jehovah labongo apokapoka mo i kom dano ducu ma gibedo i wang ticwa, omyero wabed ki miti madwong me konyo dano wek gunong ngec matir i kom Jehovah, Lubanga me ada kadi giloko leb mukene. (Jab. 83:18; Tic. 10:34, 35) Kadi bed waketo cwinywa tutwalle i kom jo ma giloko leb me kacokke ma watye iye, omyero bene waket cwinywa i kom jo ma giloko leb mukene kun nongo wayenyo yo me nywako kwedgi kwena me Ker pa Lubanga. Ka ce waneno jo ma giloko leb mukene-ni anena, ci nongo pe rwatte ki yub pa Jehovah me miyo caden bot dano me rok ducu. Dong waromo konyo jo ma pe giloko lebwa nining?
3. Gin tic ma pire tek ango ma kiyubo piwa, dok waromo yubbe me tic kwede nining?
3 Ti ki Buk me Good News for People of All Nations: Buk man kiyubo me konyowa ka warwatte ki jo ma pe giloko lebwa. Bed ki buk man kare ducu, nge bene kit me tic ki ngec ma iye kun ibedo atera me tic kwede. Ka imito tic ki buk man pi oyot, gwet leb mapat pat ma tye i wang ticwu. Ka bukkewa tye i leb magi, peny pi bukke magi wek imi bot ngat meno i nge tic ki kwena ma tye i buk man.
4. Watwero tic ki buk me Nations man nining i ticwa me pwony?
4 Ka irwatte ki ngat mo ma loko leb mukene i tic me pwony dok pe ingeyo leb ma en loko, cak ki nyutu ngec ma tye i nge buk man. Cimme kekeni ci tuc nying lobo ma ibedo iye, nyut bote bene ni imito ngeyo ka ma en a iye ki leb ma en loko. Ka iniang leb ma en loko, yab ka ma kiryeyo iye wi lok, yab pot karatac ma rwatte, nyut bot rwod ot ka ma kicoyo ki coc ma kikwoto madongo ki malo ci nyut bot rwod ot-ti ni imito ni en okwan kwena meno. Ka otyeko kwanone, mi bote trak ma kicoyo i leb mere nyo cim bote coc ma kiwero ki kala ma col ma tito ni ibidwogo me kelle buk ma kicoyo i leb ma mege. Ci nyut bote ka ma kicoyo ni “nyinga,” ki coc ma kikwoto ci wac nyingi bote. Cim bote ka ma kicoyo ni “nyingi,” ki coc ma kikwoto ci iwiny lagam ma rwod ot bimiyo. Wuyub kacel kwede awene ma ibidok iye bote.
5. Ngo ma myero watim ka wamito konyo jo ma giloko leb mukene ka gunyutu miti?
5 Yub me Lubu Kor Dano: Myero kiket tek me limo jo ma gitye ki miti me winyo lok me kwena me Ker-ri, kadi bed giloko leb mukene. Tekke waniang ni ngat moni tye ki miti i kom Lubanga ki Lokke Baibul, omyero wapong fom me Please Follow Up (S-43) ci wami cutcut bot karan me kacokke wek ocwal i jang gang kal wek kicwal dano ma loko leb meno bot ngat ma tye ki miti-ni. Ingeye, jang gang kal bicwalo fom man i gurup ma loko leb pa ngat meno. Ka kinongo fom man, ci omyero kiyeny dano man labongo galle. Karan me kacokke romo miyo kopi me fom man bot lanen wi tic wek en obed ki ngec pi miti ma jo ma loko kodi leb moni-ni gitye kwede. Fom man myero kiti kwede ka ngat moni onyutu mitti me ada.
6. Ka wanongo ngat ma tye ki miti ma loko leb mukene, tic ango ma nongo watye kwede?
6 Kare ma lac romo kato cakke i nino ma kicwalo kwede fom me S-43 nio wa i nino ma latit kwena ma loko leb pa ngat meno rwatte kwede. Pi meno, latit kwena ma ocwalo fom me S-43 ca romo medde ki dongo mitti pa dano man nio ka gucako kwano Baibul ki ngat ma loko lebbe-ni. Kare mukene, kiromo kwano Baibul ki dano ma tye ki miti-ni. Ento mono ka pud peya kinongo ngat ma loko leb pa ngat ma tye ki miti-ni, latit kwena ca romo nongo buk i leb pa ngat ma onyutu miti-ni nining?
7. Yo mukene ango ma watwero nongo kwede bukke i leb pa jo mukene ma warwatte kwedgi?
7 Bukke pi Leb Mukene: Kacokke pe myero gudur bukke i leb mukene mapol. Ento, ka lanen wi tic me pwony onongo ni miti pa jo mo ma giloko leb moni-ni tye ka dongo, en twero gwoko bukke muporo wel lutit kwena wek guti kwede. Ka kacokke pe tye ki bukke magi, ci kiromo penyo pire. Cwalo bukke i leb moni ma kipenyo pire-ni twero tero kare malac. Pi meno, kiromo kong kobo bukkewa mogo ki i intanetwa me www.watchtower.org. Tye bukke mapol ma kiketogi kunu i leb mapol mapat pat ma latit kwena nyo dano ma tye ki miti-ni twero kwanone. Pe tye akalakala mo ni ngec man twero bedo me kony mada i dongo jo ma gunyutu miti ma giloko leb mukene.
8. Gin ango ma kacokke twero timone pi dongo miti pa jo ma giloko leb mukene?
8 Gin ma Kacokke Myero Otim: I kine mogo twero bedo ni jo ma giloko leb mukene romo nya i kabedo acel ka ma nongo kacokke mo pe cok kenyo ma gibedo ki cokke i leb meno. Pi meno, myero wulwong jo ma gitye ki miti ento giloko leb mukene-ni i cokkewu. Jol ma kijologi ki mar kacel ki miti ma kinyutu botgi romo cuko cwinygi me wire i cokke ducu. Tyen me acel, peko me leb ki kit ma kaka moni timo kwede jamigi romo gwenyo wigi; ento pe tye gin mo ma gengo nyuto mar me ada ma bedo i kin Lucaden pa Jehovah ma gitye i wi lobo ducu-ni. (Jep. 3:9; Jon 13:35) In mono iloko leb mukene maber? Ka ce ingeyo dok itye ki miti me limo jo ma giloko leb man, tim ber iniang karan me kacokkewu wek kicwal ngec man i jang gang kal. Man konyo tutwal ka jang gang kal tye ka yenyo latit kwena ma twero dongo miti pa ngat ma loko leb meno.
9. Awene ma pwonyo leb mukene twero mitte iye bot lutit kwena, dok kiromo cakone nining?
9 Pwonyo Leb Mukene: Ka ce itye ka konyo jo ma loko leb mukene, gin ma iromo timone aye obedo cuko cwiny jo meno me cako wire i cokke ma kiloko iye lebgi ka tye cok. Ento, ka pe twere, lutit kwena mukene giromo pwonyo leb mukene pi konyo jo ma gunyutu miti. Ka ce kacokke mo pe ma cok ki kabedo meno, jang gang kal romo moko tam ni kicak kilaci me pwonyo leb moni-ni ka jo ma loko leb meno gitye mapol i kabedo acel. Ka tye kit meno, ci jang gang kal bimiyo ngec bot kacokke ma tye cok me niango dano pi yub ma tye me cako kilaci man. Jo ma gupenyo pi pwonyo leb man myero gutam me kobo i gurup nyo kacokke man wek gukony dongo wang tic me leb man.
10. Awene ma kiromo cako iye gurup ma loko leb mukene, dok kiromo ngeyo ni man twere nining?
10 Cako Gurup: Wek kicak gurup ma loko leb moni-ni, omyero kitim jami angwen. (1) Myero jo ma gunyutu miti obed mapol dok kabedo meno myero obed ma nen ni twero dongo doko wang tic me leb meno. (2) Lutit kwena ma giloko leb meno myero obed tye nyo ma gitye ka pwonyo leb meno. (3) Laelda ma tye ki ngec matut nyo lakony kor tic myero obed tye me telo wi jo magi dok bene otel yub me cokke acel mo i cabit acel i leb meno. (4) Luelda myero gubed ki miti me konyo kor gurup man. Ka jami magi ducu tye mupore, ci luelda giromo coyo waraga i jang gang kal pi penyo ka gurup man dong twero doko kacokke ma kiloko iye leb pa rok mukene. (Nen Buk me Organized, pot 106-107.) Laelda nyo lakony kor tic ma telo gurup man gibilwonge ni “lanen wi gurup” nyo “lakony kor gurup” ma ticgi obedo konyo gurup man.
11. Pingo obedo mot me dongo wang ticwa ma kiloko iye leb mukene?
11 Dongo wang tic ma kiloko iye leb mukene obedo yo acel ma pire tek me tito kwena i lobo ducu ma Yecu Kricito ma obedo Lanenwa-ni ocako. Wan bene myero watiyu ki mit kom wek wanen kit ma Jehovah biyengo kwede rok ducu kun kelo jami mabeco bote. (Ag. 2:7) Pud dong obedo twon mot madit botwa adada me ribbe itute man! Walego ni Jehovah ogo laane i notewa me dongo wang tic ma kiloko iye leb mukene kun wiwa po ni pe tye gin mo ma twero gengo Lubanga me dongo leb mo keken!—1 Kor. 3:6-9.
(Omedde i pot karatac 9)
Dongo Wang Tic ma Kiloko Iye Leb Mukene (Omedde)