Kit me Cako Lok

Me Cako Kwano Baibul ki Dano i Ceng Abicel Mukwongo i Julai

“Cokcok jo ducu ma gibedo i kabedowa gitye ki miti me kwo pi naka dok ki yomcwiny. Wamito kong winyo tammi i kom lapeny man: Itamo ni kare mo cayan ki yadi me cango two biweko wabedo kwo pi naka? [Mine kare wek ogam.] Nen kong ngo ma magajin man waco.” Nyut bote pok nge Wi Lubele me Julai 1, ci wunyam kacel lok ma tye i te lapeny mukwongo ki ginacoya acel mo ma kiketo kenyo. Mine magajin ci wuyub awene ma ibidok iye ka gamo lapeny ma lubo meno.

Nge ni: Kit me miyo magajin man myero kinyut i cokke me cito ka pwony ma bibedo i Julai 6.

Wi Lubele Julai 1

“Jo mapol ma waloko botgi giwacci gitye ki dinigi. Ento jo mukene giwacci dong pe gigeno dini ducu. In kono iloko ningo i kom dini? [Mine kare wek ogam.] Yecu omiyo botwa gin ma konyowa ka watye ka ngiyo dini moni. [Kwan Luka 6:44a.] Magajin man nyamo nyig mogo maraco ma dini dong onyako. Gamo bene lapeny man ni, Mono tye dini mo ma myero wagen?”

Awake! Julai

“Watye ka limo jiraniwa me lok kwedgi i kom peko mo ma odiyo dano adada​—ngolo kop alenga. Jo mukene ginyuto cwercwinygi pi ngolo kop alenga ki dorre i gudo. Itamo ni jo ma gidorre-ni tika gitwero giko tim me ngolo kop alenga? [Mine kare wek ogam.] Nen kong gin ma Baibul waco ni bikelo alokaloka me ada i lobo. [Kwan Matayo 6:9, 10.] Magajin man gamo lapeny man ni, Dorre i gudo mono aye dong yo maber loyo?”

Kwena Maber Mua ki Bot Lubanga!

“Watye ka limo jo me odi i kabedowu me nywako kwedgi kwena ma cuko cwiny ma a ki i Baibul. Jo mapol ma waloko kwedgi giuro pingo Lubanga ma lamar weko dano deno can. Mono itamo ni deno can obedo yub pa Lubanga pi lobo-ni?” Mine kare wek ogam. Ci iyab Pwony me 5, wukwan dok wunyam paragraf aryo mukwongo kacel ki ginacoya ma kicoyo ki coc ma buto abuta. Mi bote brocuwa, ci wuyub awene ma ibidok iye ka nyamo lapeny me aryone ma kicoyo ki coc ma kikwoto.