Trak Manyen ma Kiyubo i Yo Mamwonya!
1. Ngo ma kiyubogi i yo manyen pi ticwa me pwony?
1 Kinyuto trak abic manyen i Gure Madit me Distrik me mwaka 2013 ma wi lokke obedo ‘Lok pa Lubanga Aye Ada!’ Medo i kom meno Kwena me Ker Nam. 38, ma wi lokke tye ni “Jo Muto Mono Gitwero Kwo Doki?” bene kimedo i kom trak abic manyen-ni. Trak abicel magi ducu kiyubogi i yo manyen mamwonya adada. Pingo kiyubo trak magi i yo man? Ka watye ma pokogi i ot ki ot, watwero tic ki trak magi i yo maber nining?
2. Pingo kiyubo trak magi ki diro manyen?
2 Gin Mumiyo Kiyubo Trak Magi ki Diro Manyen: Wek tic i ot ki ot ogud cwiny dano, myero wati ki yo angwen magi: (1) Me cako lok, ti ki lapeny ma miyo rwod ot tito tamme. (2) Wunyam Ginacoya acel mo. (3) Mi bukkewa bot rwod ot wek okwan. (4) Wek lapeny me anyama lacen, ci iket yub me dok cen. Diro manyen ma kiyubo kwede trak magi konyowa me lubo yo angwen-ni ducu.
3. Watwero miyo trak manyen magi nining?
3 Kit me Tic Kwedgi: (1) I nge moto rwod ot, nyut bote lapeny ma tye ki lagam mapol ma i nyim trak, ci ipeny tamme. (2) Yab trak ci wunyam kwede “Gin ma Baibul Waco.” Kwan ginacoya ma kinyuto-ni ki i Baibul ka twere. Ka rwod ot tye ki cawa, ci wunyam “Ber pa Lok Man Piri.” (3) Mi trak bote, ci icuk cwinye me kwanone i cawa mupore pire. (4) Ma peya ia, nyut bote lapeny ma tye i nge trak i te wi lok me “Tam Kong” dok iket yub me nyamo lagam me Baibul ka idok cen.
4. Watwero tic ki trak manyen-ni nining ka wadok cen ka lim?
4 Dok cen ka lim bene doko yot mada. Pien itiyo ki ginacoya ma tye i nge trak me gamo lapeny ma ipenyo i agikki me limmi mukwongo. Ma peya ia ki bote, nyut cal brocuwa me Kwena Maber, wot brocuwa meno woko, nyut bote pwony ma kubbe ki lapeny ma wunyamo-ni, ci imi brocuwa bote. Ka ogamo, wuyub awene ma ibidok iye ka lim wek wunyam pwony ma i brocuwa meno. Meno dong odoko latin kwanni me Baibul! Nyo iromo miyo trak mukene ma ka miyo brocuwa, ci wuyub awene ma ibidok kwede bote wek wunyam lok ma iye.
5. Pingo trak pigi tego i ticwa me pwony?
5 Trak obedo gin ma dong kitiyo kwede i tic me pwony pi mwaka makato 130 kulu. Kadi bed kiyubogi i yo mapatpat, gubedo gin tic maber adada. Dong wageno ni wabitic ki trak magi ma kiyubogi ki diro manyen-ni me nyayo lok me Baibul i lobo ducu.—Car. 15:7a.