An Mono Anen Nining i Wang Jehovah?
1. Baibul obedo calo kiyo i yo ma nining?
1 In ingiyo wangi tyen adi i wang kiyo? Pol pa wan wangiyo wangwa nino ki nino, pien konyowa me neno ka ma mito ayuba. Kiporo Baibul ki kiyo. Kwano Lok pa Lubanga miyo waneno ngat ma wabedo i cwinywa, ngat ma Jehovah bene neno-ni. (1 Cam. 16:7; Yak. 1:22-24) Lok pa Lubanga twero “poko par ki tam mabecone ki maracone ma tye i i dano.” (Ibru 4:12) Kwano Baibul ki lwodo lok ma iye nino ducu konyowa me neno kabedo ma myero wayubbi wek wabed lutit kwena mucwiny nining?—Jab. 1:1-3.
2. Baibul twero konyowa me ngine kekenwa nining?
2 Ti ki Baibul Calo Kiyo: Lok i kom lutic pa Jehovah ma lugen ma tye i Baibul, pwonyowa i kit mabeco pa Jehovah. Me labolle, Daudi onyuto arima matek pi nying Lubanga. (1 Cam. 17:45, 46) Icaya onyuto tekcwiny i kare ma oye me tito kwena bot rok ma lok botgi tek. (Ic. 6:8, 9) Mar matut ma Yecu tye kwede pi Wonne omiyo en oneno ticce me pwony calo gin ma kweyo dok yomo cwinye ma ka nenone calo yec mapek tutwal. (Jon 4:34) Lutit kwena me cencwari me acel gutito kwena ki mit kom, gujenge i kom Jehovah, dok bene gumoko tamgi pe me juko tic meno. (Tic 5:41, 42; 2 Kor. 4:1; 2 Tem. 4:17) Bedo ka lwodo lok i kom lanen magi konyowa me yubo kitwa wek wabed ma wapore pi timo tic pa Lubanga
3. Pingo pe myero wagalle ki keto alokaloka ka ma mitte?
3 Tute me Yubo ka ma Oballe: Adada nenne ki kiyo kun pe waketo alokaloka pe yubo ka ma oballe con. Watwero lega bot Jehovah me konyowa wek wanenne ki miti me yubo ka ma mitte me ayuba. (Jab. 139:23, 24; Luka 11:13) Pien kare dong odic woko dok kwo pa dano tye ka mading, myero pe wagalle ki keto alokaloka ka ma mitte.—1 Kor. 7:29; 1 Tem. 4:16.
4. Ngo ma timme i kom ngat ma ngiyo lok pa Lubanga kun keto gin ma opwonyo i tic?
4 Gin ma Jehovah neno aye cwiny ma dano moni tye kwede makato kite ma nen ki woko. (1 Pet. 3:3, 4) Ngo ma timme i kom ngat ma ngiyo lok pa Lubanga kun keto gin ma opwonyo i tic? En “pe bedo calo ngat ma winyo ka dok wiye wil woko, ento ngat ma keto lok ma en owinyo i tic, gibimiye gum i gin ma en otiyo ducu.” (Yak. 1:25) Adada, wabibedo lutit kwena mucwiny dok cwinywa bibedo yom pien “watye macalo kiyo ma miyo deyo pa [Jehovah].”—2 Kor. 3:18.