Ti ki Baibul Calo Kiyo

Lakwena Yakobo oporo Baibul ki kiyo ma twero konyowa me neno nga ma wabedo ki i iwa. (Yak. 1:​22-25) Watwero tic ki Baibul i yo maber macalo kiyo nining?

Kwan mot. Ka warune ka neno calwa i kiyo, ci pe waromo neno gin mo marac ma gwok mito ayuba. I yo acel-lu, ka warune aruya ki kwano Baibul, ci pe wabineno alokaloka ma omyero watim i kwowa. Omyero wakwan Baibul mot dok walwod ka wek okonywa.

Nen alokaloka ma omyero in aye itim ento pe jo mukene. I kare mogo ka watye ka neno calwa i kiyo, watwero bene neno cal pa ngat mo ma tye i ngewa dok watwero bedo ka keto cwinywa i kom kit ma ginen kwede. I yo acel-lu bene, watwero kwano Baibul kun nongo walwodo kit ma jo mukene aye gitwero ketone kwede i tic i kwogi. Ento ka wakwano Baibul kit meno ci pe wabitimo alokaloka ma mitte i kwowa.

Bed ki neno mupore. Pol kare cwinywa twero tur ka wabedo ka keto cwinywa i kom gin mo ma pe wamaro ki i komwa ma waneno ki i kiyo. Omyero wabed ki neno mupore ka watye ka kwano Baibul, dok pe waket gingi tutwal i komwa me timo gin ma kerowa pe twero.—Yak. 3:17.