Wer Manyen pi Worowa!
1 I cokke pa Watch Tower Bible and Tract Society of Pennsylvania ma obedo i Oktoba 4, 2014, kimiyo lok angeya ni kibiloko buk wer ma watye kwede-ni woko. Lok angeya man pud dong oyomo cwinywa ya! Kipoyo wi jo ducu ma gubedo tye i cokke man ni werwa me Ker obedo gin ma pire tek i worowa.—Jab. 96:2.
2 Itwero bedo ki lapeny ni, ‘Pingo dok mitte ni kilok buk wer?’ Watye ki tyen lok mapol. Mukwongo, niangowa me Ginacoya tye ka medde ameda, dok meno twero gudo lok ma tye i werwa. (Car. 4:18) Tyen lok mukene pi alokaloka man: Lok mapol ma kitiyo kwedgi i buk wer me kare-ni kikwanyogi ki i Baibul me New World Translation macon. Myero dong kilok nyig lok magi wek obed ma rwatte ki Baibul manyen. Kit macalo tic matek mitte me loko nyig lok me wer magi wek obed ma rwatte, dong kimoko me medo wer mogo manyen i buk wer.
3 Tika omyero wakur wang ma kigoyo buk wer manyen ka dong wacak wero wer magi? Pe kumeno. Cwinywa yom me niangowu ni i dwe mogo ma bino anyim, kibiketo wer mogo manyen i Kabedowa me Intanet me jw.org. Ka kiketo wer mo okatti nyen, kibiketone i agikki me yub me Cokke me Ticwa ki lok ni “wer manyen.”
4 Kit me Pwonyo Wer Manyen: Twero bedo tek me pwonyo wer manyen. Ento, calo laco jabuli, wamito ni wawer i kacokkewa dok ‘pe wabed laling.’ (Jab. 30:12) Me pwonyo wer manyen, lub yo ma kiryeyo piny kany.
Bed ka winyo wer ma kigoyo ki piano, ma kibiketo i kabedowa me Intanet. Ka ibedo ka winyo wer moni kare ducu, ci bibedo yot me makone i wi.
Bed ka kwano nyig lok me wer magi dok item makone ki wi.
Wer wer moni kacel ki nyig lok ma iye. Tim kit meno nio ka dong ingeyo werone maber.
Wuwer wer manyen tyen mapol i kare me Worowu pi Jo me Ot nio ka jo me otwu dong gingeyo werone.
5 I dwe mogo me anyim ka kiketo wer moni i agikki me yub me Cokke me Ticwa, lwak me kacokke gibiwinyo wer man ma kigoyo agoya ki piano kicel. I nge meno, lwak dong biwero wer man kun gilubo dwan piano ma kigoyo, kit ma watimo kwede pi wer mukene-ni.
6 Ka watamo iye, wanongo ni wero wer i cokkewa miyo botwa kare me bedo ki yomcwiny pien waribo dwanwa kacel i pako Jehovah. Pi meno, pe omyero wakat woko labongo tyen lok mo ka kikwayowa me a malo ka wer i kare me cokkewa.
7 Pud dok tye yo mukene ma watwero nyuto kwede pwoc pi werwa me Ker. I gure me adwol ki gure madito, kiketo wer i acakki me bute acel acel. Kiryo mwaka ki mwaka, omege ki lumege ma gia ki i lobe mapatpat, giculo pi wotgi gin kikomgi ci gicito i Patterson, New York, pi goyo wer mamwonya ma watiyo kwede i worowa. Pi meno, ka wonkom okwayowa ni wabed piny i kabedowa wek wawiny wer ma omege ki lumege magi gugoyo piwa, omyero watim kit meno. Ka watimo meno, bikonyowa me yubo cwinywa pi ngec ma wabinongone.—Ejira 7:10.
8 Wabigiko cokkewa matin, ki wero wer manyen ma wi lokke tye ni “Ker-ri Dong Tye ka Loc—Wek Obin!” Wer man, ma kiwero tyen mukwongo i cokkewa ma bedo mwaka ki mwaka-ni, kicoyo, kigoyo dok kimako pi kwero mwaka 100 me loc pa Ker-ri.
9 Wer manyen magi obedo ‘jami mabeco’ ma a ki bot Jehovah. (Mat. 12:35a) Dong, omyero wamoku tamwa me pwonyo wer manyen magi kun wawerogi ki cwinywa ducu, wek wami pak ki deyo bot Lubanga!—Jab. 147:1.