Tam ma Twero Konyi

Mak “Wer me Cwiny” i Wi

“I nino mogo ma awinyo calo konya pe, Jehovah cuko cwinya kun tiyo ki wer ma i JW Broadcasting^®.”​—Lorraine, ma bedo i Amerika.

“Wer me cwiny” kare ducu gubedo but worowa macalo Lukricitayo. (Ep. 5:19) Ka imako wer magi i wi, gitwero konyi kadi bed ipe ki buk wer nyo tet pa Muno. Tem tic ki yo magi me mako wer mogo i wi.

• Kwan lok ma i wer meno ki diro wek iniang tyene maber. Ka iniang tyen lok moni maber, ci wi bitwero po iye oyotoyot. Lok ma i werwa ducu, kadi wa wer ma katti i JW Broadcasting^® ki wer pa lutino, ginonge i jw.org/ach. I bute me Laibrari, cit i Wer.

• Co lok ma i wer meno i karatac. Timo meno bikonyi me mako lok magi i wi.​—Nwo. 17:18.

• Bed ka werone ki dwan malongo. Bed ka kwano nyo wero wer meno teretere.

• Tem po iye. Tem po i kom lok ma i wer meno labongo neno karatac ma icoyo iye-ni, ci irot karatac meno me neno ka itimo maber.