Ti ki jw.org i Ticci me Pwony​—“Dok Larem Jehovah”

Bute me jw.org ma wiye tye ni “Pwony me Baibul” (“Bible Teachings”) tye ki yub pi lutino ma kilwongo ni “Dok Larem Jehovah” (“Become Jehovah’s Friend”) ma tye ki wer, vidio, ki jami me atima. Tika dong itiyo ki bute man i ticci me pwony? Ka itye ka kwano Baibul ki lanyodo ma tye ki lutino, pingo pe inyut bute man bote? Man twero tugo mitine me ngiyo but Kabedowa me Intanet mukene bene.

I kare me poko Kwena me Ker Nam. 38, omego acel orwatte ki dako mo ma ogamo trak man ci ocako kwano cutcut. En onongo tye ki lutino matino ma gitye ki miti i kom trak man. Omego-ni onyamo kwede macek jami ma tye i trak man dok onyute Kabedowa me Intanet ki i nge trak. Kit ma dako-ni onongo tye ki miti, omego-ni okwanyo kare me nyuto bote ki lutinone vidio pa Kaleb acel, kun tiyo ki cimme.

Lamego mo otito bot latic lawote ma tye ki lutino matino lok i kom Kabedowa me Intanet ki ngec ma tye iye pi jo me odi. Dako-ni ocito i jw.org kacel ki lutinone. Lacen, en owaco bot lamegowa ni en ki lutinone gubedo ka wero wer me “Tit Lok-ki,” ma tye i kin wer ma i bute me “Dok Larem Jehovah.”

Tem pwonyo kit me tic ki but jw.org man, dok ikwany vidio, wer, nyo jami me atima iket i cimmi. Ka itimo meno, ibibedo atera me tic ki but jw.org man i tic me pwony. Man pud dong obedo gin tic maber ma konyowa me tic pi Rwot ya!​—Tic 20:19.