Kit me Tito Kwena Kun Watiyo ki Meja Kacel ki Lalor Bukke

Miyo caden kun watiyo ki lalor bukke nyo meja odoko yo maber atika me ywayo jo ma cwinygi mwol wek gunge lok me ada. (Jon 6:44) Pi man, kicuko cwiny luelda me keto yub pi miyo caden i dye lwak i kabedo ma dano mapol woto iye ki tyengi i wang tic me kacokkegi. Kit macalo jami tic magi pe kiketo i kabedo acel, pol kare pe mitte ni myero wapeny twero ki bot luloc. Angagi ma gupore me timo tic man? Lutit kwena ma gitye ki niang matut, girukke i yo ma kelo woro, dok gingeyo lok bot dano ki woro. Magi aye jami mogo ma myero watim ki ma myero pe watim wek wacob tic man maber.

Tim Kit Man:

Bed larem, jol dano, dok ikony jo ma gitye ka kato. Lutit kwena mukene gibwunyo, dok gimoto dano ki yomcwiny. Ka ngat ma tye ka kato oneno meja nyo lalor bukke, ci iromo wacce ni, “Ka ineno gin ma cwinyi mito iromo kwanyone.”
Cung ka mabor bor ki lalor bukke. I kabedo mukene, lutit kwena ginongo adwogi maber ka gucung macok ki lalor bukke. Ento jo mukene gitamo ni dano twero bedo ki lworo ka gucung cok tutwal, pi meno gicung mabor ki lalor bukke nio ka dano mo obino ocung kenyu. Ka dong dano obino cok ki lalor bukke, ci gicako lok bote ki penyo lapeny calo ni, “In tika onongo dong itamo i kom lapeny man?”
Ti ki Baibul ka twere.
Tit yubwa me kwano Baibul bot ngat mo keken ma ogamo bukke ma watiyo kwede me kwan ki lutino kwan, calo buk me Baibul Pwonyo. Penye ka itwero nyuto bote vidio me Pingo Myero Ikwan Baibul? kun itiyo ki cim nyo tet mukene ma twero nyuto vidio.
Ka twere peny namba cimme nyo kit ma iromo nonge kwede. Ka dano meno pe bedo i wang ticwu, labongo galle pong fom me Please Follow Up (S-43) ci imi bot karan me kacokkewu cut.