Kony Lutowang me Pwonyo Lok i kom Jehovah
1. I yo ango ma Yecu onyuto kwede kica bot lutowang?
1 To pa Yecu onongo dong onyiko cok. I kare ma en onongo tye ka a ki i Jeriko, lutowang aryo ma gilego cente gudange matek ni: “Lakwar Daudi, timwa kica ba!” Kadi bed peko ma Yecu cok wot ki iye onongo dong onuro tamme mada, Yecu ocung, olwongo co aryo-ni bote ci ocangogi. (Mat. 20:29-34) I yo ma nining ma wan waromo lubo lanen pa Yecu me bedo lukica bot lutowang?
2. Watwero miyo caden bot latowang mo ma warwatte kwede i dye lwak nining?
2 Mi Kony: Ka irwatte ki latowang, calo i dye lwak, titte bote ci ipenye ka itwero miye kony. Kit macalo jo magi pol kare dano nywarogi nyo kiterogi marac, en twero kong tamo ni in dano marac. Ento kit me lirem ki miti me ada ma itye kwede twero weko en bedo agonya. Wi opo bene ni, to wang tye i rwom mapat pat, dok meno twero weko ingeyo kony ma myero imi bote. I nge miye kony, iromo wacce ni itye ki tic me pwonyo dano ki Baibul. Kwan bote ginacoya calo Jabuli 146:8 nyo Icaya 35:5, 6. Ka en twero kwano coc pa lutowang (Braille), penye ka en mito buk ma tye i Braille ma twero konye me pwonyo lok me Baibul. Itwero bene konye me kwanyo jami ma kimako i dwan keken ki i jw.org. Ka kompiutane tye ki purogram ma kwano coc ki i kompiuta ki dwan malongo, ci pwony ma kikwanyo ki i jw.org i coc madongo nyo RTF (Rich Text Format) twero bedo me kony bote.—Nen bok ma wiye tye ni “Ka Itye ka Konyo Latowang . . .”
3. Watwero yenyo lutowang ma gitye i wang ticwa nining?
3 Yeny Lutowang: I ticwa me pwony i ot ki ot, warwatte ki lutowang kicel kicel keken pien pol pa lutowang pe giwinyo agonya me lok bot wele ma guo i pacigi. Pi meno, tute matek mitte wek ‘waniang’ ka lutowang tye i kabedo meno wek wami botgi caden. (Mat. 10:11) Itye ki latic lawoti nyo latin kwan lawoti ma latowang? Kwany kare me lok bote. Ka wang ticwu tye ki cukul pi lutowang, ter bukkewa mogo me Braille pi laibrari me cukul meno. Tika ingeyo ngat mo ma tye ki wat ma latowang? I wang ticwu mono wutye ki dul mogo ma gimiyo kony bot lutowang nyo gigwoko lutowang? Tit bot wat pa ngat meno, lajol wele nyo dairekta me kabedo meno ni Lucaden pa Jehovah gitye ki miti matek me konyo lutowang, dok ni ibikelo bukke me Braille nyo jami ma kimako i dwan keken. Nyut bote cikke me Baibul ni Lubanga cokcok-ki bicango to wang matwal. Iromo bene nyuto vidio me jw.org ma wiye tye ni “Without It, I Would Feel Lost,” ma kwako kwo pa laco mo ma latowang ma onongo kony pi bedo ki Baibul me Braille. Ka watito tyen lok me limwa, man twero yabo yo piwa me rwatte ki lutowang mogo.
4. Pwony ango ma wanongo ki i lanen pa Janet?
4 Lamego mo ma latowang ma nyinge Janet olimo kabedo ma kigwoko iye lutowang. En ocako lok ki dako mo. Janet owacce ni, “Yecu ocango lutowang me nyuto gin ma en bitimo pi lutowang ducu i anyim.” Gunyamo pwony ma tye i Niyabo 21:3, 4 kacel, ci Janet otito bote kit ma Ker pa Lubanga bicobo kwede cikke man. Dako-ni kong oling mot ci lacen owacci: “Peya onongo awinyo tam man ki bot latowang. Pol pa jo ma gineno piny gitamo ni to wang bino macalo adwogi marac pa gin ma wan nyo kwarowa gutimo.” Janet ocwalo e-mail bot dako man kun tito bote pi buk me Baibul Pwonyo, dong kombeddi gitye ka kwano Baibul kiryo cabit ki cabit.
5. Kadi bed pe watwero yabo wang lutowang kit ma Yecu otimo kwede, nyuto miti i komgi bikeliwa mot ango?
5 Ngene kene ni pe watwero yabo wang lutowang kit ma Yecu otimo kwede, ento watwero konyo jo ma lubanga me lobo man oumo tamgi, kadi wa lutowang, wek guniang ada ma i Lok pa Lubanga. (2 Kor. 4:4) Yecu ocango lutowang aryo cok ki Jeriko pien “kica omako” en i komgi. (Mat. 20:34) Ka wanyuto miti ma kit meno i kom lutowang, ci wabinongo mot me konyogi me pwonyo lok i kom Jehovah, ngat ma bikwanyo to wang matwal.