Jami Ticwa me Pwony
1. I yo ango ma lutit kwena gitye calo lutic cing?
1 Lutic cing gitiyo ki jami tic mapatpat. Jami tic mogo kitiyo kwedgi kicel kicel pi tic matego keken, ento mukene kitiyo kwedgi nino ducu. Lutic cing ma giryek gibedo ki jami tic me nino ducu-ni i komgi cawa weng, dok gidoko ludiro i tic kwedgi. Baibul cuko cwiny Lakricitayo acel acel me bedo “latic ma pe ki gin mo ma lewic myero omake iye.” (2 Tem. 2:15) Gin ango ma dong pire tek loyo ki i kin jami ticwa? Baibul, ma Lok pa Lubanga aye obedo gin tic ma pire tek loyo ma watiyo kwede me ‘loko dano wek gudok jo ma lubo kor Yecu.’ (Mat. 28:19, 20) Pi meno, myero watute me “tero lok me ada i yo atir.” Ento bene, tye jami tic mogo ma watiyo kwedgi ma Lukricitayo ducu myero gupwony diro me tic kwede pi pwonyo lok ada.—Car. 22:29.
2. Jami tic mukene ango ma omyero wapwonye me tic kwede?
2 Jami Ticwa me Nino Ducu: Medo i kom Baibul, jami tic mukene ango ma watiyo kwede? Gin ticwa ma pire tek loyo pi pwonyo lok ada me Baibul aye buk me Baibul Mono Ada Pwonyo Gin Ango? I nge tyeko buk meno ki latin kwan, watiyo ki buk me ‘Wubed i Mar pa Lubanga’ me pwonyo en wek olub cik me Baibul i kwone me nino ducu. Pi meno, myero wadok ludiro i tic ki bukke aryo magi. Brocuwa mogo bene myero wati kwedgi me pwonyo dano. Kwena Maber Mua ki Bot Lubanga! aye brocuwa ma pire tek loyo pi cako kwano Baibul ki dano. Ka wang ticwa tye ki dano mapol ma pe gingeyo kwan nyo giloko leb ma watye ki bukke manok keken iye, waromo bene tic ki Winy Lok pa Lubanga nyo Winy Lok pa Lubanga wek Ibed Kwo Nakanaka. Gin tic mupore me konyo lutino kwan me ngeyo dul pa Jehovah aye Jo Mene Ma Gitye Ka Timo Miti pa Jehovah i Kare-ni? Vidio ma konyowa me pwonyo dano calo Pingo Myero Ikwan Baibul?, What Happens at a Kingdom Hall?, ki Does God Have a Name?, gubedo jami tic ma myero wapwony tic kwedgi maber.
3. I kare me anyim, Ticwa Me Ker bikonyowa me timo ngo?
3 I kare me anyim, Ticwa Me Ker bikonyowa me doko ludiro i tic ki jami ticwa me nino ducu pi pwony. Ka watute me tic ki jami tic mapat pat magi, nongo watye ka lubo tira man ni: “Gwokke keni, dok igwok pwonnyi bene; mak matek, pien ka itimo kumeno, in kikomi ibilarre ki jo ma winyi bene.”—1 Tem. 4:16.