Tit Kwena Bot “Kit [Dano] Ducu”
1. Lutit kwena mucwiny gubedo calo lupac ma ludiro i yo ango?
1 Lapac ma ladiro tye ki jami me ticce mapol dok ngeyo awene, ki kit me tic ki gin tic acel acel. Rom aroma ki wan bene, watye ki jami tic mapatpat ma konyowa wek wacob tic me tito lok me kwena maber-ri. Me labolle, watye ki brocuwa ma loko i kom jami ma mapatpat ma kiyubogi me konyowa wek watit kwena ki “kit [dano] ducu.” (1 Kor. 9:22) Karatac ma kiluto i Ticwa Me Ker man ryeyo brocuwa magi mogo, dok tito anga ma kigoyo pigi, ki dong kit me nyutugi bot dano.
2. Awene ma waromo tic ki brocuwa mapatpat i tic me pwony?
2 Kit ma Waromo Tic Kwede ki Brocuwa Magi: Lapac obiyero me tic ki gin tic moni tekke konye tye. I yo acel-lu watwero nyuto brocuwa mupore bot ngat moni tekke waniang ni en binongo adwogi maber loyo ki iye, kadi bed ni brocuwa-ni pe obedo bukke me atera i dwe meno. Me labolle, ka bukke ma watye ka terone i dwe moni aye buk me Baibul Pwonyo dok watye ka tito kwena i kabedo ma Lukricitayo nok iye, ki pol pa dano mitigi nok i kom Baibul, bedo ber ka kong wamiyo brocuwa ma rwatte ka dong lacen wanyutu buk me Baibul Pwonyo i nge niang ni dano-ni tye ki miti.
3. Pingo omyero wadok ludiro i tic ki jami ticwa mapatpat me miyo caden?
3 Ginacoya loko maber i kom jo makwiri i ticgi. (Car. 22:29) Pi man pe tye tic mo ma pire tek dong loyo ‘tito lok me kwena maber ma a ki bot Lubanga.’ (Rom. 15:16) Dong me bedo “latic ma pe ki gin mo ma lewic myero omakke iye,” myero watute me doko ludiro i tic ki jami tic ma watye kwede.—2 Tem. 2:15.