Lub Lanengi me Niye
1. Buk mene ma wabikwano i Cokke me Kwano Baibul cakke i cabit me Oktoba 19?
1 I cabit ma cakke i Oktoba 19, 2015, wabicako nyamo buk me Imitate Their Faith i Cokke me Kwano Baibul. Buk man nyamo lok i kom co ki mon 14 ma gubedo ki niye matek i kare me Baibul. Buk man kicoyo i yo ma konyowa me goyo cal jo magi i wiwa, weko wanenogi calo jo ma gukwo ada dok ma guwoto ki i ariya mapol i kare me ticgi pi Jehovah. Buk man bene pwonyowa kit me lubo lanen pa jo magi.—Ibru 6:12.
2. Tit kong jami mogo ma tye i buk me Imitate Their Faith.
2 Jami ma Iye: Buk man tye ki lain ma nyuto kare me timme pa jami (time line) ki mep ma konyowa me ngeyo awene ki kwene ma dano moni okwo iye. Medo i kom meno, dul acel acel me buk man tye ki bok ma wi lokke tye ni “Lapeny me Alwoda . . . ,” ma bikonyowa me lwodo lok i kom pwony moni ki keto gin ma wapwonyo i tic. Buk man bene opong ki cal mabeco ma konyowa me goyo gin moni i tamwa.
3. Ngo ma myero watim ka wamito nongo adwogi maber ki i buk man?
3 Kit me Nongo Adwogi Maber: Waraga ma oa ki bot Lukiko Madit i acakki buk man cuko cwinywa ki lok magi: “Ti ki tammi, kun igoyo cal jami ma tye ka timme. Tem winyo kit ma jo me Baibul guwinyo kwede, dok inen gin ma guneno. Por kit ma gudok i jami mutimme ki kit ma in onongo ibidok iye.” Ada, tic ki tammi pe te lokke ni ibyeko gin moni abyeka, ento itemo goyo i tammi jami ma kitito i Baibul kun iwinyo kit ma jo ma iye guwinyo kwede. Timo man mito cawa ki lwodo lok. (Nek. 8:8) Ka pwony ocakke i dyere me dul, ngat ma doro kwan man myero kong owot wiye wiye i pwony ma okato pi cekon 30 me o i 60. Kiromo penyo lapeny acel nyo aryo me dolo tere ka pwony me nino meno pe ki bok me “Lapeny me Alwoda . . . ”
4. Pingo myero wakwan buk me Imitate Their Faith?
4 Watye ka kwo i lobo ma nino ducu mito balo nyo turo niyewa i yo mo keken. Buk man—ki pwony mapat pat ma pud katti i Wi Lubele, ka ma pwony me buk man kikwanyo ki iye—obedo mot ma a ki bot Jehovah me konyowa wek wabed ma niyewa tek. (Yak. 1:17) Dong, watiyu ki karewa maber kun wabedo tye i Cokke me Kwano Baibul ducu, dok wanywaku iye ki miyo lagamwa kit ma watwero i kare me kwano buk man kacel!