Dongo Dirowa i Tic me Pwony—Kony Lutino Kwan Wek Gudong Yo Maber me Kwan

Gin Mumiyo Pire Tek: Wek latin kwan me Baibul odong i yo me cwiny, en pe myero opong tamme ki cwinye ki ngec ma pigi tego ma i Lok pa Lubanga keken. (Ibru 5:12–6:1) Kwan mito tute. Kwako ribo ngec manyen ki ma onongo ingeyo con ki neno kit ma twero konyi kwede. (Car. 2:1-6) Pwonyo kit me kwedo lok konyo lutino kwan me nongo lagam me Baibul kun nongo gitiyo ki bukkewa. Tute me pwonyo ki keto i tic gin ma gupwonyo yubogi me cung matek i kom atema ma bino i kom Lukricitayo.—Luka 6:47, 48.

Kit me Timone:

Nwo bot lutino kwan ni pire tek me lega pi kony ma a ki bot Jehovah kare ducu ka wucako kwan ki ka wugiko kwanwu.—Jon 14:26; 1 Kor. 2:10.
I acakki me kwanwu cut, cuk cwiny latin kwan me yubbe con pi kwan. Nyut bote buk ma in itiyo kwede, kun inyutte kit me ngolo te lagam ki lok ma pigi tego keken.
Wek latin kwanni omi lagam kit ma en oniang kwede. Gwokke ki kodi kwan ma latin kwan moni kwano lagam atir ki i buk.
Cuk cwiny latin kwan-ni olo me kwano Lok pa Lubanga nino ducu. Nyut bote ka ma kiketo yub me kwano Baibul ma tye i jw.org, ma nyuto kit me kwano Baibul i yo mayot. Wek latin kwan odong miti me kwano Baibul nino ducu mito tute kacel ki mitti matek, ento adwogine bedo ber mada pire.—Jab. 1:2, 3.
Nyut bot latin kwan-ni kit ma en twero nongo kwede lagam me Baibul kun tiyo ki Watchtower Library nyo Watchtower ONLINE LIBRARY. Konye wek onge nukuta ma kitiyo kwede pi bukke acel acel ma kitiyo kwedgi i cokke me kwano Baibul.

Tem Timo Kit Man i Dwe-ni:

I agikki me dul nyo wi lok matidi peny latin kwan wek otit macek cek gin ma en oa ka pwonyone. Ka ipe ki latin kwan bed ka temo lwodo lok ma pigi tego ma tye i Baibul nyo paragraf me Wi lubele macek cek, man twero konyi ka itye ka kwan.