Dongo Dirowa i Tic me Pwony​—Cako Lok ki Dano Twero Konyi me Miyo Caden

Yecu obedo ki kare me miyo caden ma pe oyubbe iye bot dako mo me Camaria pien en ocako lok kwede. Watwero dongo dirowa me cako lok ki dano nining?

• Nyut cwiny me lirem dok ilok ki dano. Kadi bed Yecu onongo ool, en ocako lokke ki penyo mere pii. Itwero cako ki moto ngat-ti ki yomcwiny, ci gwok nyo iloko i kom kit ma piny-nye tye kwede nyo gin mo mutimme cokcok-ki. Wi opo ni, miti-ni tye me cako lok kwede, pi man lok i kom gin mo keken ma twero gudo cwinye. Ka en pe ogamo lok-ki, pe ipar. Tem lok ki ngat mukene. Leg bot Jehovah pi tekcwiny.​—Nek 2:4; Tic 4:29.

• Bed atera me tic ki kare mo keken muwec me tito kwena maber-ri, ento pe irune. Lok kwede kit ma iloko kwede jwi kun itero lokki motmot. Ka idido lok, lworo twero mako ngat-ti ci en juko lok kwedi. Cwinyi pe otur ka lokwu ogik labongo miyo caden. Ka ilworo tito kwena maber-ri, bed ka poro cako lok labongo yub me miyo caden. [Tuk ci wunyam vidio me 1.]

• Tem miyo caden ki tito pi niyeni ki yomcwiny, i yo ma twero weko dano gipenyi me gonyo te lok-ki. Yecu owaco lok me ur adada mumiyo dako-ni openyo lapeny. I kare ma en dong ocako tito kwena maber-ri, Yecu onongo tye ka gamo lapenye. [Tuk ci wunyam vidio me 2, ingeye tuk ci wunyam vidio me  3.]