Gin ma Dano Giwaco i Kom Lega
“Ka alego, awinyo calo Lubanga tye i ka ngeta, dok omako cinga kun tela ka awinyo calo arweny woko.”—MARÍA.
“Dakona oto i nge lweny ki two kanca pi mwaki 13. Wiya po ni alego bot Lubanga nino ducu dok awinyo calo en tye ka winyo legana kadi bed atye ki arem matek. Abedo ki kuc i cwinya.”—RAÚL.
“Lega obedo mot mamwonya adada ma Lubanga omiyo ki dano.”—ARNE.
María, Raúl, Arne, ki jo mukene gineno lega calo obedo mic ma pire tek adada. Giwinyo ni pi lega gitwero lok ki Lubanga, gipwoye kun bene giyenyo kony ki bote. Giye ki cwinygi ducu ni gin ma Baibul waco i kom lega bot Lubanga tye ada: “Gin ma miyo wabedo ki gen i kome en ene ni, ka walegge gin mo kun walubo gin ma en mito, ci en winyo legawa.”—1 Jon 5:14.
Ki tungcel, jo mapol ginongo ni tek me ye gin ma Baibul waco i kom lega. Steve wiye po i kom kit ma en onongo winyo kwede i kom lega. En owaco ni: “I kare ma mwakana oromo 17, lurema adek guto i akciden aryo mapatpat. Ngat acel oto i kare ma opoto ki mutoka, jo aryo gulwiny woko i nam.” Gin ango ma Steve otimo? En otito ni, “Alego bot Lubanga wek omina lagam pingo jami magi ducu gutimme, ento pe anongo lagam mo. Pi meno apennye kekena ni, ‘Pingo omyero alegi?’” Jo mapol dong guwinyo calo legagi pe kigamo, pi meno gipenye kekengi pingo omyero gimedde ki lega.
Dano bene giwinyo calo lega pe konyo pi tyen lok mukene. Jo mogo giwaco ni kit ma Lubanga ngeyo jami ducu-ni, en dong ngeyo pekkiwa ki jami ma wamito con, pi meno konye pe me titte.
Jo mukene gitamo ni Lubanga pe ye winyo legagi pi bal ma gutimo i kare mukato angec. Jenny owaco ni, “Pekona madit aye ni, awinyo calo konya pe. Atimo jami mogo ma weko akoko ange, pi meno, amoko i cwinya ni pe opore pi Lubanga me winyo legana.”
In iwinyo nining i kom lega? Ka itye ki par nyo akalakala i kom lega, ci itwero nongo kwe cwiny ka iniang ni Baibul miyo lagam mucwiny pi lapeny madok i kom lega. Watwero geno gin ma Baibul waco i kom lega;a Baibul twero konyi me nongo lagam pi lapeny calo:
Lubanga tika winyo legawa?
Pingo Lubanga pe gamo lega mukene?
Itwero lega nining wek Lubanga owiny legani?
Lega twero konyi nining?
a Baibul tye ki lega pa lutic pa Lubanga mapol, kadi wa Yecu Kricito. Ginacoya me leb Ibru, ma pol pa dano gilwongo ni Cik Macon tye ki lega makato 150 kulu.