Gin Ango ma Twero Konyowa me Bedo ki Anyim Maber?

Kit ma kinyamo kwede i pwony mogo ma okato-ni, dano tye ka tute me nongo anyim maber ki keto gengi i kom teko ma pe nen, kwan i rwom ma lamal, lonyo, kacel ki bedo jo ma kitgi beco. Ento ka itiyo ki yo magi me nongo anyim maber, ci bedo calo cito i kabedo ma pe ingeyo kun itiyo ki mep ma pe tye kakare. Tika meno tyen lokke ni pe tye gin mo ma twero tirowa me nongo anyim maber? Pe tye kit meno!

TIRA MA A KI KA MABER LOYO

Ka watye ki tam me amoka, pol kare wapenyo ngat mo ma oteggi dok maryek loyowa. I yo acel-lu, watwero nongo tira ma genne pi anyimwa ki bot Ngat mo ma oteggi dok ryek loyowa i rwom ma lamal. Watwero kwano tirane ki i buk mo ma kilwongo ni Baibul ma kicako coyone mwaki 3,500 angec.

Pingo watwero geno Baibul? Pien Ngat ma oweko kicoyo aye Ngat ma orii dok maryek loyo i polo ki lobo. Kilwonge ni, “Ngat ma yam okwongo bedo kwo wa con” dok “ma bedo nakanaka.” (Daniel 7:9; Jabuli 90:2) En aye ma “oketo polo, en bene aye ma obedo Lubanga! En ocako tic me keto lobo, ci otiyo otyeko.” (Icaya 45:18) En otitiwa ni nyinge kilwongo ni Jehovah.—Jabuli 83:18.

Baibul pe tito ni tekwaro nyo rok moni ber kato mukene. Tye kit meno pien lok ma iye oa ki bot ngat ma Ocweyo dano ducu. Tam ma iye tiyo kare ducu dok okonyo dano ma i lobe ducu. Tye nonge i leb mapol dok en aye buk ma pud dong kipoko loyo buk mo keken.a Pi meno, dano ma i kabedo ducu gitwero kwanone dok ginongo adwogi maber ki iye. Meno rwatte ki lok man ma tye i Baibul:

“Lubanga pe poko kin dano, ento en jolo dano ma i rok ducu ma gilworo en ki ma gitiyo gin ma tye atir.”—TIC PA LUKWENA 10:34, 35.

Kit macalo lanywal ma lamar miyo tira ki lutinone, Lubanga Jehovah obedo Wego ma lamar ma miniwa kony kun tiyo ki Lokke, Baibul. (2 Temceo 3:16) Itwero geno Lokke pien en aye ma ocweyowa dok ngeyo gin ma twero keliwa yomcwiny.

WATWERO GENO BAIBUL

Watwero geno gin ma Baibul tito madok i kom kwo me anyim pien i kare-ni waneno jami ma tye ka timme ma Baibul otito pire mwaki ma romo 2,000 angec.

JAMI MA TYE KA TIMME

“Rok bilweny ki rok wadi, ker bilweny ki ker wadi; ki oyengyeng madongo biyengo lobo, kec laparanat ki two gemo mapatpat bipoto i kabedo mapol.”—LUKA 21:10, 11.

KIT PA DANO

“I kare me agikki, piny bibedo marac i kare mogo. Pien dano bibedo ka maro komgi kengi kun gibedo lumar lim, luwakke, lucac, lunywar jo mukene. Pe gibiwinyo lunyodogi, pe gibimiyo pwoc mo, gibibedo jo ma pe leng. Pe gibimaro dano wadgi, gibibedo jo ma pe timo kica bot dano, gibibedo lucok dog jo mukene, gibibedo jo ma mitgi pe jukke, jo ma ger ma gidag gin mo maber, luroro, jo ma tye atata ma pe giparo piny, jo ma gikette malo kengi ki wakke, jo ma maro yomcwiny ma ka maro Lubanga.”—2 TEMCEO 3:1-4.

Twere nining ni Baibul otito jami magi ducu kakare? Labongo akalakala mo, ibiye lok pa laco mo ma nyinge Leung, ma a ki i lobo Hong Kong, ma owaco ni: “Lok pa lunebi me Baibul kicoyogi wa con. Pe twere ki dano adana me byeko jami magi ci gicobbe kore ki kore. Baibul myero obed ni oa ki bot ngat mo ma ryek loyowa.”

Baibul tye ki lok pa lunebi miya mapol ma dong gucobbe kakare.b Man nyuto ada ni Baibul obedo Lok pa Lubanga. Jehovah owaco ni, “An Lubanga kena, pe dok tye mo mukene ma cal kwede. . . . Cakke con i acakki piny, anyuto kit ma gin man bitimme kwede woko.” (Icaya 46:9, 10) Pi meno, itye ki tyen lok maber me jenge i kom gin ma Baibul waco i kom kwo me anyim.

TIRA MA TWERO KONYI I KARE-NI KI I ANYIM

Ka ilubo tira ma nonge i Buk Maleng, inongo adwogi maber. Nen kong labol mogo.

BEDO KI NENO MUPORE I KOM CENTE KI TIC

“Twara inong yweyo manok ma romo pong cing keken, loyo ma itiyo matek ma rom ki pong cing aryo kacel ki ryemo kor yamo.”—LATITLOK 4:6, NWT.

KWO ME OT

“Laco acel acel i kinwu myero omar dakone macalo maro kome kene, ki dako bene myero onen ni eworo cware.”—JO EPECO 5:33.

WAT I KINWA KI JO MUKENE

“Pe iwek kiniga omaki, dok ibwot akemo obedi; pe ibed ki par iye, pien tim ma kit meno kelo gin marac keken.”—JABULI 37:8.

Keto i tic gin ma Baibul waco konyi i kare-ni dok yabbi yo me bedo ki anyim maber. I Baibul, wanongo cikke pa Lubanga madok i kom anyim mamwonya ma bibedo ki

KUC KI PINY MA OKWE MOT

“Gibibedo ki yomcwiny pi lonyo [kuc] madwong ma gibilimo.”—JABULI 37:11.

ODI KI CAM PI DANO DUCU

“Dano gibigero odi ci gibedo i igi, gibipuro poto olokgi, ci gibicamo nyige bene.”—ICAYA 65:21.

TWO KI TO BIBEDO PE

“To bene dong bibedo pe, kadi kumo nyo koko, nyo arem.”—NIYABO 21:4.

Ngo ma omyero itim wek ibed ki anyim ma kit meno? Nen pwony ma lubo man.

a Pi ngec madok i kom kit ma kigonyo dok kipoko kwede Baibul, cit i www.jw.org dok inen i te BIBLE TEACHINGS > HISTORY & THE BIBLE.

b Pi ngec mukene, nen dul me 9 i buk me The Bible—God’s Word or Man’s? ma Lucaden pa Jehovah aye gucoyo. Tye nonge i kabedowa me Intanet me www.jw.org. Nen i te LIBRARY > BOOKS & BROCHURES.