Gin Maber ki Marac: Baibul—Miyo Tira ma Genne

Pe watwero bedo ki gen ni tam ma wamoko bikelo adwogi maber ka wajenge i kom kit ma wan nyo jo mukene giwinyo kwede. Baibul nyutiwa pingo tye kit meno, ento pe gik kenyo. Konyowa me ngeyo gin maber ki marac, ma meno konyowa me bedo ki yomcwiny i kwowa.

WAMITO TIRA KI BOT LUBANGA

I Baibul, Lubanga Jehovaha otito ni dano mito kony ma mege dok pe gitwero doro kwogi pigi kengi. (Jeremia 10:23) Meno aye tyen lok ma oweko en omiyo tira ma nonge i Baibul. En maro dano dok pe mito ni wamok tam maraco ma bikeliwa peko dok weko kwowa bedo matek adada. (Nwoyo Cik 5:29; 1 Jon 4:8) Makatone, macalo Lacwecwa, en tye ki ryeko kacel ki ngec ma mitte me miniwa tam ma pud dong ber loyo. (Jabuli 100:3; 104:24) Kadi bed kit meno, Lubanga pe diyo dano ni gulub rwom me kwo matir ma en oketo.

Jehovah omiyo bot luot mukwongo, Adam ki Kawa, jami ducu ma gimito wek gubed ki yomcwiny me ada. (Acakki 1:28, 29; 2:8, 15) En bene ominigi cik mayot ma onongo en mito ni gulubi. Ento, en oweko gubedo agonya me yero ka ce gibilubo cik meno nyo pe. (Acakki 2:9, 16, 17) Ki cwercwiny, Adam ki Kawa guyero me kwo ma lubbe ki rwom ma megi me ka lubo rwom ma Lubanga oketo pigi. (Acakki 3:6) Adwogine obedo ningo? Tika dano gibedo ki yomcwiny ka gumoko pigi kengi gin ma atir ki marac? Pe. Pi mwaki mapol, waneno ni cayo rwom me kit ma atir pa Lubanga pe kelo kuc ki yomcwiny ma rii.—Latitlok 8:9.

Baibul miyo tira ma mitte me konyowa moko tam mabeco, labongo paro pi ka ma wakwo iye nyo kit paco ma waa ki iye. (2 Temceo 3:16, 17; nen bok ma wiye tye ni “Buk ma Kicoyo pi Dano Ducu.”) Nen kit ma Baibul timo kwede man.

Nong ngec mapol i kom pingo kitwero lwongo Baibul ni “lok pa Lubanga.”—1 Jo Tecalonika 2:13. Nen vidio ma wiye tye ni Lok me Baibul Obedo pa Anga? i jw.org/ach.

GIN MUMIYO JO MOGO GICAYO BAIBUL

Jo mukene giwaco ni Baibul pe twero miyo tira maber ka odok i kom kit ma atir ki marac. Gitwero waco lok macalo magi.

Giwaco ni: “Lok mogo ma i Baibul pe rwatte.”

Lok Ada: I acakkine, twero nen calo but Baibul mogo pe rwatte ki bute mukene. Ento ka iniang kare ma kicoyogi iye kacel ki kit ma kicoyogi kwede, ci ibinongo ni bute magi ducu rwatte.

Me neno labol mogo, kwan pwony ma wiye tye ni “Tika But Baibul Mogo Pe Rwatte ki Mukene?” (“Are There Contradictions in the Bible?”) i jw.org.

Giwaco ni: “Jo ma giwaco ni gilubo tam me Baibul gitimo bal madongo, pi meno Baibul pe twero miniwa tira maber.”

Lok Ada: Pe opore me kok i kom Baibul pi tim maraco pa jo ma pe giketo tirane i tic. Baibul otito con ni jo mapol—kadi wa lutela dini—ma giwaco ni gilubo lok me Baibul gibitimo olungtuke pa gin ma Baibul pwonyo. Otito bene ni, macalo adwogine, “bimiyo dano cayo” pwony me Baibul.—2 Petero 2:1, 2.

Me neno labol acel i kom kit ma lupwonye dini mapol gitimo kwede olungtuke me gin ma Baibul pwonyo, kwan pwony ma wiye tye ni “Tika Dini Obedo Mere Dul me Biacara Mukene?” (“Is Religion Just Another Big Business?”) i jw.org.

Giwaco ni: “Jo ma gilubo Baibul pe giworo jo ma kwogi pat ki meggi.”

Lok Ada: Baibul cuko cwinywa me nyuto woro bot jo mukene. Baibul pe cwako tim magi. . .

nene ni piri tek loyo jo mukene. —Jo Pilipi 2:3.
cayo jo ma kitgi nyo niyegi pat ki mewa.—1 Petero 2:17.
diyo jo mukene me lubo tamwa.—Matayo 10:14.

Baibul nyuto ni Lubanga kare ducu tero dano i yo me kica dok maber, dok ni Lubanga mito ni watim kit meno bene. —Jo Roma 9:14.

Pi ngec mukene, kwan pwony ma wiye tye ni “Kit ma Baibul Twero Konyowa Kwede me Nyuto Woro” i jw.org/ach.

BAIBUL TITTIWA GIN MA LUBANGA MITO KI BOTWA

Baibul tittiwa lok madok i kom wat i kin dano ki Lubanga nicakke i acakki piny. Gin ma tye i Baibul konyowa me niang gin ma Lubanga neno ni tye atir ki marac, gin ma twero konyowa ki ma kelo awano i komwa. (Jabuli 19:7, 11) Pwony ma wanongo ki i iye tye ada kare ducu dok bikonyowa me moko tam me ryeko i kwowa me nino ducu.

Me labolle, nen kong tam ma nonge i Carolok 13:20: “Ngat ma bedo kacel ki jo maryek pwonnye doko ryek bene, ento ngat ma mako lurem ki luming kite biballe woko.” Tam meno pud tiyo wa i kare-ni, kit ma onongo tiyo kwede i kare macon. Baibul opong ki tam ma kit meno ma konyowa.—Nen bok ma wiye tye ni “Tam ma Nonge i Baibul Pud Tye me Kony.”

Ento iromo bedo ka pennye ni, ‘I yo ma nining ma atwero bedo ki gen ni tam ma nonge i Baibul twero konya?’ Pwony ma lubo man binyamo labol pa dano mogo ma Baibul okonyogi.

a I Baibul me leb Acholi, nying Lubanga, Jehovah nyo Yawe nonge i Nia 3:15, i coc ma tye i tere piny.

TAM MA NONGE I BAIBUL PUD TYE ME KONY

Kadi bed kityeko coyo Baibul cokcok mwaki 2,000 angec, lok ma iye pud tye me kony wa i kare-ni. Dano kare ducu giyenyo yomcwiny kacel ki kwo maber. (Latitlok 1:9) Ryeko ma nonge i Baibul twero konyowa me cobo yub meno.

Bedo Lagen

“Wamito ni wati gin maber i kare ducu.”—Jo Ibru 13:18.
“Dano ma yam bedo ka kwalo jami pa jo mukene myero dong owek kwo obedi; myero en ocak tiyo tic maber ki cinge.”—Jo Epeco 4:28.

Wat i Kinwa ki Jo Mukene

“Dano pe olub gin ma konyo en keken, ento myero olub gin ma konyo lawote bene.”—1 Jo Korint 10:24.
“Ngat acel acel odi cwinye i kom lawote, kun wutimo kica ki luwotwu i kinwu kekenwu pi balwu.”—Jo Kolocai 3:13.

Kit me Moko Tam

“Dano ma laming ye jami ducu ayeya, ento ngat maryek kong ngiyo ka kwene ma en ecito iye.”—Carolok 14:15.
“Dano ma wiye tiyo ka oneno gin marac bino i kome, kanne woko; ento lakwiya piny medde mere ameda, ci neno can ada.”—Carolok 22:3.