Tika wi Po?

Tika iketo cwinyi ka kwano Wi Lubele ducu me mwaka-ni? Ka kumeno, nen kong ka itwero gamo lapeny magi:

Adwogi maber ango ma watwero nongone ka wakwanyo kare me lok ki Jehovah, winyo lokke, ki dong tam i kome?

Wabimoko tam me ryeko, wabidoko lupwonye ma ludiro, niyewa bidongo bedo matek, dok marwa pi Jehovah bidongo.—w22.01, pot 30-31.

Adwogi maber ango ma wabinongo ka wapwonnye me geno Jehovah kacel ki jo ma en tiyo kwede me doro dulle?

Man aye kare me pwonnye me geno yo ma Jehovah timo kwede ki jami kun pe wabedo ki akalakala i kom tira kacel ki tam ma luelda moko. Ka twon can madit atika-ni ocakke, wabibedo atera me lubo kadi wa tira ma nen calo niang iye tek.—w22.02, pot 4-6.

Ngo ma onongo lamalaika-ni tye ka lok iye i kare ma owaco bot Jekaria lok madok i kom “birigi i cing [Gabuna] Jerubabel”? (Jek. 4:8-10)

Ginanyuta man ocuko cwiny jo pa Lubanga ni kadi bed ot pa Lubanga manyen-ni onongo pe nen mwonya tutwal, onongo kibityekone dok onongo bibedo ma rwatte ki rwom me kit ma atir ma Jehovah mito.—w22.03, pot 16-17.

Itwero bedo “lanen maber . . . i lokki” nining? (1 Tem. 4:12)

Waloko ki kica kacel ki woro i ticwa me pwony, wawero ki cwinywa ducu, wamiyo lagam kare ki kare i cawa me cokke, dok waloko lok ada, waloko i yo ma dongo jo mukene, kun wagwokke ki yet.—w22.04, pot 6-9.

Pingo jami ma tye i kom lee (ker) angwen ma kiloko i komgi i Daniel cura 7 kiribogi i kom lee acel kit ma kitito kwede i Niyabo 13:1, 2?

Lee mager ma kiloko i kome i Niyabo 13 pe cung pi ker acel keken, calo Roma. Ento, cung pi gamente ducu ma guloyo dano nio wa i kare-ni.—w22.05, pot 9.

Watwero nyuto ni wageno ngolo kop pa Jehovah nining?

Ka ngat mo oyetowa, ocwero cwinywa, nyo otimo bal i komwa, watute pe me mako akemo i cwinywa, kun waweko jami ducu i cing Jehovah. En bijwayo pekki ducu ma bal okelo.—w22.06, pot 10-11.

Omego ma tye ka lega i cokke myero wiye opo i kom ngo?

Pe omyero kiti ki lega me miyo tira bot kacokke nyo me miyo lok angeya. Tutwalle ka en tye ka lego lega me yabo cokke, omego ma tye ka lega-ni pe myero oti ki “lwak lok mapol.” (Mat. 6:7)—w22.07, pot 24-25.

I yo ma nining ma “jo ma ceng gutimo marac bidonyo i cer me ngolo kop”? (Jon 5:29)

Pe gibikemme ki ngolo kop marac ma lubbe ki kwogi macon. Kibingiyo kitgi kacel ki jami ma gibitimo i nge cergi.—w22.09, pot 18.

Lok me cuko cwiny ango ma J. F. Rutherford owaco i gure madit ma obedo tye i Sektemba 1922?

I gure madit ma obedo tye i Cedar Point, Ohio, lobo Amerika, en owaco ni: “Kabaka tye ka loc! Wun aye wutye ki tic me tito pire bot dano ducu. Dong wurwe, wurwe, wurwe, pi Kabaka ki Kerre!”—w22.10, pot 3-5.

Icaya cura 30 nyuto yo adek mene ma Jehovah konyowa kwede me kanyo pekkiwa?

Cura man nyuto ni en (1) winyo dok gamo legawa, (2) miniwa tira, dok (3) goyo laane i komwa i kare-ni dok biminiwa mot i kare me anyim.—w22.11, pot 9.

Pingo watwero moko ni lok ma tye i Jabuli 37:10, 11, 29 ocobbe i kare macon dok bicobbe i kare me anyim?

Lok pa Daudi meno otito pi kwo mamwonya ma obedo tye i Icrael, me labolle i kare me loc pa Solomon. Yecu bene oloko i kom paradic ma bibedo tye i kare me anyim dok onwoyo lok ma tye i tyeng me 11. (Mat. 5:5; Luka 23:43)—w22.12, pot 8-10, 14.