Lapeny Pa Lukwan Bukkewa

I Jabuli 145:2 Daudi owaco ni ebipako nying Lubanga “nakanaka.” Tika man tyen lokke ni en onongo tamo ni pe ebito?

Pe. Gin ma Daudi ocoyo-ni tye ada dok kakare.

I tyeng meno Daudi owaco ni, “Abipako nyingi nakanaka.” (Jab. 145:1, 2) I tyeng mukene, Daudi bene owaco ni, “Amiyo pwoc boti ki cwinya ducu, ai Rwot [Jehovah] Lubangana, abibedo ka miyo deyo boti kun atuco nyingi nakanaka.”—Jab. 86:12.

I kare ma Daudi ocoyo lok meno, en onongo pe tye ka tamo ni pe ebito matwal. En onongo ngeyo ni Jehovah owaco ni dano gibito pien ni gubalo, dok Daudi bene oye ni en labalo. (Acak. 3:3, 17-19; Jab. 51:4, 5) En bene onongo ngeyo ni kadi wa co ma lugen calo Abraim, Icaka ki Yakobo guto woko. Dok Daudi ongeyo ni i kare mo ebito. (Jab. 37:25; 39:4) Ento lokke ma tye i Jabuli 145:2 onyuto mitine me pako Lubanga nakanaka, nyo, i kare ma nongo en Daudi pud etye kwo.—2 Cam. 7:12.

Daudi onongo i kare mogo coyo lok i kom jami mutimme i kwone, kit ma watwero neno kwede ki i lok me ka wi Jabuli 18, 51, ki 52. I Jabuli 23, Daudi, ma onongo obedo lakwat, oloko i kom Jehovah macalo lakwat ma miyo tira, yweyo, kacel ki gwok. Man oweko Daudi obedo ki miti me tic pi Lubanga ‘pi kare me kwone ducu.’—Jab. 23:6.

Wi myero opo bene ni Jehovah aye otiro Daudi me coyo jami ducu ma en ocoyo. Jami ma en ocoyo tye iye lok pa lunebi ma onongo bicobbe mwaki mapol i anyim. Me labolle, i Jabuli 110, Daudi ocoyo lok i kom kare ma Rwode ‘bibedo tung acuc [pa Lubanga]’ i polo kun nongo teko madwong adada. Teko me timo ngo? Me loyo lumone pa Lubanga ki ‘ngolo kop i kom jo me rok ducu’ ma i wi lobo. Daudi obedo kwaro pa Yecu, ma en aye obedo Meciya. Meciya onongo biloc ki i polo dok ‘bibedo lalamdog nakanaka.’ (Jab. 110:1-6) Yecu omoko ni lok pa lanebi ma nonge i Jabuli 110 onongo tye ka lok i kome dok bicobbe i anyim.—Mat. 22:41-45.

Ada, Jehovah otiro Daudi me coyo lok ma kwako karene kacel ki kare me anyim ma Jehovah bicero Daudi ci en bipako Jehovah nakanaka. Pi meno, Jabuli 37:10, 11, ki 29 onongo kwako kare ma kicoyo iye ki bene kare ma tye anyim. Tyeng magi ocobbe i kare macon i lobo Icrael dok bicobbe i anyim i kare ma Lubanga bicobo cikkene ducu.—Nen paragraf me 8 i pwony ma wiye tye ni “Ibibedo Kweda i Paradic” ma tye i magajin man.

Lok pa Daudi ma nonge i Jabuli 145:2 kacel ki tyeng mukene marom nyuto ni Daudi onongo mito pako Jehovah nio wa i tone. Dok ki i tyeng magi, wangeyo ni Daudi bibedo ki kare me pako Lubanga pi naka i kare ma Jehovah bidwoke cen i kwo.