Peko me Two Wic Tye i But Lobo Ducu
“Pol kare abedo ki par, kadi bed ape ki tyen lok mo me bedo ki par.”
“Ka awinyo ni kwona tye maber, man bene kela par. Gin mutimme i kwona oweko angeyo ni ka cwinya yom adada, ci ma pe orii wang ma abedo ki cwercwiny.”
“Atute me keto cwinya i kom gin ma tye ka timme i kwona i nino acel acel. Ento i kare mukene, paro pi jami mapatpat bwoya atura.”
Lok magi obedo lok pa jo ma gitye ka lweny ki peko me two wic. Tika in nyo ngat mo ma itye ka gwokone bene winyo kit meno?
Bed ki gen ni pe itye keni. Jo mapol i kare-ni gitye ka lweny ki adwogi me two wic ma meggi nyo pa ngat mo ma gimaro.
Labongo akalakala mo, watye ka kwo i kare ma ‘piny tye marac,’ dok man tye ka kelo par mapol. (2 Temceo 3:1) Ma lubbe ki dul me World Health Organization (WHO), kwed mo acel ma kitimo i wi lobo ducu, nyuto ni dano acel i kin jo aboro nongo tye ka lweny ki two wic.a Medo i kom meno, ma lubbe ki WHO, macalo adwogi me two Korona, wel dano ma gutwoyo two par omedde ki pacen 26 cakke ki i mwaka 2019 me o i 2020. Dok i mwaka 2020, wel dano ma gutwoyo two wic omedde ki pacen 28 ka kiporo ki mwaka 2019.
Pire tek me ngeyo wel jo ma gitye ka lweny ki peko me two wic kacel ki par. Ento pire tek makato me ngeyo kit ma in kacel ki ngat ma imaro wutwero bedo maberber kadi bed wutye ka lweny ki two man.
Wic ma tiyo maber bedo nining?
Ngat ma wiye tiyo maber pol kare winyo maber dok tiyo ticce maber. En nongo twero kanyo par ma dano gikato ki iye i kwo me nino ducu, en cobo ticce maber, dok winyo ni eyeng ki kwo.
Two wic . . .
PE obedo adwogi me gin mo marac ma itimo.
OBEDO peko me yotkom ma weko wi ngat moni twero nywene, dok nongo pe twero juko kit ma en winyo nyo timo kwede ki jami.
Twero weko bedo tek ki ngat meno me bedo ki wat macok ki jo mukene dok weko en nongo ni tek adada me timo jami ma mitte i kwo me nino ducu.
Twero mako ngat mo keken labongo paro pi mwaka, tekwaro, rok, kaka, dini, rwom me kwan, nyo ka en tye lalonyo nyo lacan.
Nongo kony pi peko me two wic
I kare mogo, ngat mo twero cako timme i yo mapat atura, en twero cako nino pi cawa malac mukato kare woko nyo manok adada, en twero cako camo cam madwong nyo matidi adada makato kit ma camo kwede jwi, nyo bene en twero winyo ni etye ki par madwong nyo cwercwiny. Ka gin ma kit ma tye ka timme, ci twero mitte ni ngat meno onong kony ki bot latic me yotkom wek okonye oniang gin ma tye ka kelo alokaloka ma kit meno, kacel ki kit me cangone. Ento itwero nongo kony ki kwene?
Laco maryek loyo ma okwo i lobo, Yecu Kricito, owaco ni: “Jo ma komgi yot pe gimito daktar, ento kono jo ma komgi lit aye.” (Matayo 9:12) Jo ma gitye ka lweny ki peko me yotkom ma ginongo kony me ot yat ma opore, pol kare twogi pe diyogi tutwal dok kitwero konyogi me kwo maber dok ki yomcwiny. Tye me ryeko ni ngat ma kome lit myero pe ogalle ki nongo kony me ot yat ka lanyut magi tye matek dok orii.b
Kadi bed Baibul pe obedo buk me yotkom, pwony ma tye iye twero konyowa weko wabedo ki wic ma tiyo maber. Walegi ni ikwan pwony mapatpat ma tye i magajin man ma ginyamo kit ma Baibul twero konyowa kwede me lweny ki peko me two wic.
a I magajin man, ibinongo kiketo nying two wic mapatpat i braket i leb Muno.
b Wi Lubele pe miyo tam i kom yo me cango ma ngat moni myero oyer. Ngat acel acel myero ongi matut yo mapatpat me cango ma opore pire ma peya en omoko tamme.