4 | Baibul Miyo Tam ma Tiyo

Tyen Lokke

Kadi bed Baibul pe obedo buk me yotkom, ento miyo tam ma tiyo. Tam man twero konyo ngat ma tye ka yelle ki peko me two wic. Nen kong labol mogo.

Tam Magi Twero Konyi Nining?

“Jo ma komgi yot pe gimito daktar, ento kono jo ma komgi lit aye.” —MATAYO 9:12.

Baibul ye ni twero mitte ni wayeny kony me ot yat. Jo mapol ma gilwenyo ki peko me two wic gunongo kony ki i pwonyo jami ducu ma gitwero madok i kom twogi, kacel ki cito bot ludaktar.

“Rweyo ler kom tye ki kony.” —1 TEMCEO 4:8.

Timo jami ma twero weko komi bedo yot romo bene konyo wi me tic maber. Jami calo rweyo ler kare ki kare, camo cam ma moce tye, ki nongo yweyo kacel ki nino muromo.

“Yomcwiny kelo yotkom, cwercwiny miyo dano mok woko.”—CAROLOK 17:22.

Kwano lok me Baibul ma cuko cwiny kacel ki keto yub ma itwero cobo, romo konyi me bedo ma cwinyi yom. Ka iketo cwinyi i kom jami mabeco i kwo dok iye ni kwo bibedo maber i anyim, man bikonyi me lweny ki pekoni me two wic.

“Jo mamwol gibibedo ki ryeko.”—CAROLOK 11:2.

Itwero nongo ni pe itye ki kero me timo jami ducu ma imito timone, pi meno bed atera me jolo kony ki bot jo mukene. Twero bedo ni luremi ki lupaconi gimito konyi, ento nongo pe gingeyo ngo ma imito kikome. Wek gunge kony ango kikome ma in imito. Pe ibed lagingi tutwal, dok kare ducu nyut pwoc pi kony ma gumini.

Kit ma Tam ma Baibul Miyo Tye ka Konyo Kwede Lutwo

“Onongo awinyo calo gin mo tye marac i koma, pi meno acito ka nongo kony ki bot daktar. En obedo ki kare me niang twona. Man okonya me bedo ki neno ma atir i kom pekona ki me pwonyo yo me cango mapatpat ma atwero tic kwede me gwoko yotkoma.”—Nicole,a ma tye ki two wic ma kilwongo ni bipolar disorder.

“Anongo ni kwano Baibul nino ducu kacel ki dakona konya me cako nino acel acel ki tam ma atir dok mabeco. Dok i nino mogo ma nongo atye ka yelle matek ki twona, tyeng mo me Baibul cuko cwinya.”—Peter, ma tye ki two par.

“Pe obedo yot me tito ki jo mukene pi twona pien lewic onongo maka matek. Ento larema mo macok owinyo lokka mot dok otute me niang kit ma awinyo kwede. En okonya me winyo maberber ki me winyo ni pe atye kena.”—Ji-yoo, ma yelle ki two par ma genge cam maber.

“Baibul okonya me bedo ki neno mupore kun anongo yweyo muromo dok pe atiyo mukato kare woko. Ryekone okonya me lweny ki peko me two wic ma yela-ni.”—Timothy, ma tye ki two wic ma kilwongo ni obsessive-compulsive disorder.