2 | “Cuko Cwiny ma Wakwano i Ginacoya”

BAIBUL WACO NI: “Gin ducu ma yam gicoyo i kare macon ca onongo gicoyo me pwonyowa, wek wacir can, dok bene owek wabed ki gen pi lok me cuko cwiny ma wakwano i ginacoya.”—JO ROMA 15:4.

Tyen Lokke

Baibul jingowa ki lok me kwecwiny ma twero konyowa ka watye ka tamo pi jami maraco. Kwena me Baibul bene miniwa gen ni macok cok-ki kibijwayo arem cwiny ducu.

Kwano Baibul Twero Konyi Nining?

Wan ducu walwenyo ki par i kare mogo; ento jo ma tye ki two par nyo two wic gibedo ki arem cwiny kare ducu. Kwano Baibul twero konyogi nining?

Baibul tye ki tam mabeco mapol ma twero leyo ka tam maraco. (Jo Pilipi 4:8) I ada, kwano Baibul twero weko ibedo ki tam maber dok ma wi opye mot kun ijukke keni ki i tamo tam maraco.—Jabuli 94:18, 19.
Baibul twero konyowa me jukke ki tamo ni konywa pe.—Luka 12:6, 7.
Wang Ginacoya mapol cuko cwinywa ni pe watye kenwa dok ni Lubanga, Lacwecwa, niang kit ma wawinyo kwede maber adada.—Jabuli 34:18; 1 Jon 3:19, 20.
Baibul tye ki cikke pa Lubanga ni en bijwayo pekki ducu ma kelliwa par. (Icaya 65:17; Niyabo 21:4) Ka watye ka lweny ki tam ma kelliwa lworo, watwero nongo ni cikke pa Lubanga miniwa teko me medde ki kanyo.

Kit ma Baibul Tye ka Konyo Jessica

Kit ma Two Wic Guda Kwede

“I kare ma onongo atye ki mwaka 25, koma obedo lit adada dok ludaktar gunongo ni atye ki two par matek adada (severe depression). Abedo ka tamo tam maraco i kom jami malit ma otimme i kwona dok tam man obino atura ma onongo pe atwero jukone. Ludaktar gukonya me niang ni two par matek meno obino macalo adwogi me bedo ka tamo tam maraco i kom jami malit ma otimme con i kwona. Medo i kom mwonyo yat, onongo mitte ni alok ki ladiro me yotkom wek okonya me niang ki dong me timo alokaloka i kit ma atamo kwede.”

Kit ma Baibul Tye ka Konya Kwede

“I kare ma two wic odiya adada, lworo onongo bwoya, par diya matek, dok onongo pe anino. Pol kare i dyewor, tam maraco onongo diya adada dok onongo pe atwero jukone. Kit ma Jabuli 94:19 tito kwede, Lubanga twero kweyo cwinywa ka tam mapol odiyowa. Pi meno, onongo aketo Baibulla kacel ki buk coc i nget kabutona. Ka onongo pe atwero nino, akwano wang Ginacoya mogo wek Lubanga okwe cwinya.

“Baibul cuko cwinywa me jwayo tam mo keken ma pe rwatte ki lok ada ma wangeyo i kom Lubanga. I kare ma okato, onongo atamo ni konya pe dok ngat mo keken pe twero mara. Ento apwonyo ni tam ma kit meno pe rwatte ki pwony me Baibul ma nyuto ni Lubanga obedo Wego ma lamar dok ma lakica adada ma paro piwa. Motmot acako doro kit ma atamo kwede, me ka ye ni tamma maraco aye odor kwona. Apwonnye me nenne kekena kit ma Lubanga nena kwede. Man obedo yo acel ma okonya adada me jwayo woko tam marac ma onongo atye kwede i koma kekena.

“Atye ka kuro kare ma dong wiya pe bipo i kom jami ducu malit ma otimme i kwona, dok abibedo ka tam i yo maber. Angeyo ni i kare me anyim two wic bibedo pe. Man konya me kanyo pekona i kare-ni kun aketo cwinya i kom kare me anyim ma pe dong abitwoyo two wic.”