3 | Labol ma i Baibul Twero Konyi

BAIBUL LOKO I KOM . . . Co ki mon ma lugen ma onongo bene ‘giwinyo calo wan.’—YAKOBO 5:17.

Tyen Lokke

Baibul opong ki jami mutimme i kwo pa co ki mon ma gukato ki i jami mapatpat. Ka wawoto ki kwano jami mutimme i kwogi, ci watwero nongo ni ngat mo i kingi owinyo kit ma wan bene watye ka winyo kwede.

Man Twero Konyi Nining?

Wan ducu wamito ngeyo ni jo mukene giniang kit ma wawinyo kwede. Man tye lok ada tutwalle ka watye ka lweny ki peko me two wic. Ka wakwano gin mutimme i kwo pa dano ma i Baibul, wapwonyo ni gin bene gutamo dok guwinyo kit ma wawinyo kwede. Macalo adwogine, waniang ni jo mukene bene gukato ki i peko meno, dok man miyo wawinyo ni pe watye kenwa ka watye ka lweny ki par kacel ki tam maraco.

Baibul tye ki lok pa dano mapol ma onongo giwinyo ni ngat mo pe twero konyogi. Tika dong nino mo iwinyo kit man; ‘Pe dong amito medde ki kwo’? Moses, Elia, ki Daudi bene guwinyo kit meno.—Wel 11:14; 1 Luker 19:4; Jabuli 55:4.
Baibul tittiwa lok i kom dako mo nyinge Anna ma onongo “cwinye cwer matek” pien en pe twero nywal dok nyeke onongo ngale matek pi peko man.—1 Camuel 1:6, 10.
Baibul tittiwa lok i kom laco mo ma nyinge Yubu ma okato ki i pekki macal ki megwa. Kadi bed en onongo tye ki niye matek, en olwenyo ki pekki mapol dok nino mo acel owaco ni: “Adag bedo kit man; pe amito kwo.”—Yubu 7:16.

Ka wapwonyo kit ma jo magi guloyo kwede tam maraco, ci wan bene wabinongo teko me kanyo pekkiwa.

Kit ma Baibul Tye ka Konyo Kevin

Kit ma Two Wic Guda Kwede

“I kare ma acok o mwaka 50, ludaktar guwacca ni atye ki two wic ma kilwongo ni bipolar disorder. I kare mogo, awinyo calo atwero cobo peko mo keken i kwona. Ento i kare mukene, awinyo calo kwo konye pe.”

Kit ma Baibul Tye ka Konya Kwede

“Dano acel ma labolle konya adada obedo lakwena Petero. En otimo roc mogo i kwone ma oweko onongo winyo calo konye pe. Me ka bedo ka tamo ni konye pe, Petero pe obedo ka kene ento oyenyo lurem ma giparo pire. Ka two wic ki par odiya adada, gorona weko awinyo calo konya pe. Calo Petero, apwonnye me bedo cok ki lurema ma gimito konya wek pe ail cinga woko.

“Labol pa ngat mukene me Baibul ma cuko cwinya adada obedo Kabaka Daudi. En onongo bedo ki par pi gin mutimme i kwone dok onongo koko ange pi bal ma en otimo i kare mukato angec. Aniang kit ma en owinyo kwede, pien i cawa mukene an bene atimo jami nyo awaco lok ma weko akoko ange. Lokke ma tye i Jabuli 51 cuko cwinya adada. I tyeng me 3, Daudi owaco ni: ‘Angeyo balla ducu maber, dok kare ducu wiya po i kom bal ma atimo.’ Man aye kit ma awinyo kwede kikome ka par odiya, pien nongo pe yot me tam i yo ma atir i koma kekena. Ento bene lok pa Daudi ma tye i tyeng me 10 konya adada: “Ai Lubanga ma Lacwec, miya abed ki cwiny mulony, ket cwiny manyen ma pe lokke obed i iya.” Alego kit meno bot Lubanga me konya bedo ki neno mupore i koma kekena. Ki dong me agikki, tyeng me 17 cuko cwinya adada. Tyeng man waco ni: ‘Ai Lubanga, in pe ibicayo ngat ma cwinye cwer ki ma ongut.’ Tyeng man weko angeyo ni Lubanga mara.

“Lubo lanen pa dano me Baibul kacel ki keto tamma i kom mot ma Lubanga omina i kare-ni, ojingo genna pi anyim maber. Timo man weko ajingo genna i kom cikke me Baibul dok man weko amedde ki kanyo pekona.”