Gin Mutimme i Kwo

Nyut Cwiny me Kica bot Dano Ducu

I nino mo acel, laminwa mo ma bedo i lobo New Zealand oneno vidio mo ki i jw.org ma loko i kom kit ma Jehovah pe tye ki cwiny me kica keken ento bene nyuto kicane. (Ic. 63:​7-9) En omoko tamme me keto i tic gin ma opwonyo-ni ci ocako yenyo kare me miyo kony bot jo mukene. Lacen i nino meno, i kare ma en ocito ka wilo cam, orwatte ki dako mo ma gange pe dok lak ata, ci odyere me wile cam. Dako-ni oye. I kare ma laminwa odwogo ki ginacama, en omiyo caden bot dako-ni kun tiyo ki trak me Peko Mono Bigik?

Dako-ni ocako koko. En otito ni lunyodone gubedo Lucaden dok gupwonye ada, ento en pe odoko Lacaden. Kadi bed kit meno, macok cok-ki, en obedo ka lega bot Jehovah pi kony me dwogo cen bote. Laminwa-ni omiyo ki dako meno Baibul dok oketo yub me kwano Baibul kwede.a

Calo Jehovah, wan bene waromo nyuto cwiny me kica bot jo mukene, ma man kwako wa wadiwa kacel ki omegiwa ki lumegiwa me kacokke. Dok watwero nyuto cwiny me kica ka wayenyo kare me tito ki jo mukene lok i kom Jehovah.