Gin Maber ki Marac: Gin ma Jo Mapol Gijenge Iye

Cokcok dano ducu giye ni tye jami mogo ma nen ka maleng ni ber nyo rac. Me labolle, pol pa dano gikwero tim calo nek, buto ki dano tektek, ki nywaro lutino, kun gipwoyo ngolo kop atir ki cwiny me kica. Ento ka odok i kom jami calo ngat ma myero gibut kwede, ka omyero giwac lok ada nyo goba, nyo kit me pwonyo lutino kono? I kabedo magi, jo mapol gitamo ni yo matir nyo marac pe. Gitamo ni gin mo keken ma guyero ber. Pol kare dano moko tamgi ma lubbe ki kit ma giwinyo kwede kacel ki kit ma jo ma i ka ngetgi giwinyo kwede i kom lok meno. Tika meno obedo tam maber?

KIT MA WAWINYO KWEDE

Pol kare wamoko tamwa kun wajenge i kom kit ma wawinyo kwede ka odok i kom gin ma atir ki gin marac, ma pol kare walwongo ni cwiny ma ngoliwa kop. (Jo Roma 2:​14, 15) Kadi wa lutino matino bene gingeyo ka gin moni pe tye kakare, dok cwinygi pidogi ka gutimo gin marac. Ka wawoto ki dongo, wapwonyo kit me timo gin ma atir ki gin marac ki bot lupacowa, luwotwa, lupwonyewa, jo me kabedowa, diniwa, ki tekwarowa. Ka watye ka moko tam, cwiny ma ngoliwa kop tittiwa ka ce gin ma wayero rwatte ki gin ma wapwonyo ni tye atir nyo rac.

Cwiny ma ngoliwa kop twero weko wanyuto kica ki pwoc, dok watero dano maber. Twero bene jukowa ki timo jami ma romo cwero cwiny jo ma wamarogi nyo ma romo keliwa lewic, alano, ki poto cwiny.

Tika kit ma wawinyo kwede kare ducu konyowa me moko tam maber? I kare ma Garrick onongo pud awobi, en oyero me kwo i yo marac dok en owaco ni, “Onongo atwero timo gin mo keken ma iya mito.” Ento, en oniang ni timo gin ma en winyo ni tye atir pol kare pe okelo adwogi maber. Lacen en otito ni onongo epe ki yomcwiny mo keken pien kwone opong ki tim tarwang, tic ki yadi calo jayi, mero, kacel ki tim gero.

KIT MA JO MUKENE GIWINYO KWEDE

Medo i kom kit ma wawinyo kwede, pol kare wamoko tam ma lubbe ki kit ma jo mukene gineno kwede tam meno. Meno twero konyowa me nongo adwogi maber ki i ngecgi kacel ki ryekogi. Watwero nongo woro ki bot lupacowa, luremwa, ki jo me kabedowa ka watimo gin ma gitamo ni tye atir.

Tika lubo kit ma jo mukene giwinyo kwede obedo yo maber me moko tam? I kare ma Priscila onongo pud anyaka, en oyero me lubo gin ma pol lureme onongo gitimo, ci obedo ka buto ki co mapatpat. Ento, en onongo ni, timo gin ma dano gineno ni tye atir pe okele yomcwiny. En otito ni: “Timo gin ma lurema ducu onongo gitye ka timo pe oweko awinyo maber. Oweko atimo tim me mingo dok ma keto kwona ka mading.”

TIKA TYE YO MO MABER LOYO ME MOKO TAM?

Ka watye ka yero gin maber ki marac, kit ma wawinyo kwede ki kit ma jo mukene giwinyo kwede pire tek adada. Ento meno keken pe kare ducu kelo adwogi maber. I kine mukene, watwero kelo peko i komwa kekenwa nyo i kom jo mukene pien nongo pe waneno adwogi ma tamwa bikelo. (Carolok 14:12) Dok kadi bed wan nyo jo mukene watamo ni gin moni tye atir, pud twero kelo peko i komwa dok tamgi twero lokke woko. Tye ni, kadi wa kit mogo ma yam kineno ni rac dong i kare-ni kijolo i kabedo mapol, kun kit mogo ma onongo kineno ni ber dong kineno calo pe opore.

Tika tye gin mo maber ma watwero jenge iye me moko tam i kom gin ma atir ki gin marac? Tika tye rwom me kwo mo ma waromo lubo kombeddi ma pe biweko wakoko ange mwaki mogo i anyim?

Ki pwoc madit, tye gin mo ma miyo tira ma genne i kom kit ma atir ki marac, ma tiyo pi dano ducu i kabedo ducu. Pwony ma lubo man binyamo ka ma watwero nongo iye tira maber loyo ma konyowa me moko gin maber ki gin marac.