Gin Maber ki Marac: Tam ma Omyero Imoki
Rwom me kwo ma wayero me lubone bimoko kace wabibedo ki yomcwiny nyo pe. Lubanga Jehovah ngeyo meno. Meno aye tyen lok ma omiyo en mito ni wakwo ma lubbe ki rwomme.
Jehovah mito ni wabed ki kuc kacel ki yomcwiny i kwowa.
“An a Rwot Lubangawu amito pwonyowu wek wubed maber, kun atelowu i yo ma myero wuwot iye. Kono yam wubedo ka winyo cikka, kono ber! Kono kucwu omol calo kulu ma mol jwi, kono wuloyo lok calo nam ma piine mol labongo yweyo-ni.”—Icaya 48:17, 18.
Macalo Lacwecwa, Lubanga ngeyo yo maber loyo ma omyero walubi. En mito ni walub tirane pien bikeliwa adwogi maber loyo. Ka walubo cik pa Lubanga, pe wabibedo ki akalakala kace gin ma wayero bikeliwa adwogi maber. Nongo kare ducu watye ka yero yo maber, ma bikeliwa kuc kacel ki yomcwiny.
Jehovah pe penyowa me timo gin ma pe watwero.
“Cik ma acikowu kwede tin-ni pe tek twatwal ma cobone loyowu, dok pe tye ka mabor kwedwu.”—Nwoyo Cik 30:11.
Me kwo ma lubbe ki rwom ma atir pa Lubanga, twero mitte ni walok tamwa ki kit ma wakwo kwede. Ento, Jehovah pe tye ka penyowa me timo gin ma pe watwero. Macalo Lacwecwa, en ngeyo ka ma kerowa gik iye. Dok ka wamedde ki ngeyo Jehovah, ci wabinongo ni “cikke pe nurowa.”—1 Jon 5:3.
Jehovah ocikke me konyo jo ma giyero me kwo ma lubbe ki cikke.
“An a Rwot [Jehovah] Lubangawu, dong amako cingwu ma lacuc woko liking; an atye ka waco botwu ni: ‘Pe wulwor, an abikonyowu.’”—Icaya 41:13.
Watwero kwo i yo ma Lubanga mito pien en bikonyowa. En twero konyowa kun tiyo ki Lokke, Baibul, ma miniwa cuko cwiny kacel ki gen.
Dano milion mapol i but lobo-ni gunongo ni kwo ma lubbe ki rwom me Baibul oyubo kwogi. Wacuko cwinyi me kwanyo kare me pwonyo tam maber ma Baibul tye kwede. Itwero cakone ki kwano brocuwa ma jenge i kom Baibul ma wiye tye ni Bed ki Kwo Maber Nakanaka! ma tye nonge me nono i jw.org/ach. Tye ki pwony adek magi:
Baibul Twero Konyi Nining?
Baibul Miniwa Gen
Tika Itwero Geno Baibul?
Ka iwoto ki kwano Lok pa Lubanga, ci ibiniang ni cikke “gimoko matwal dok giri nakanaka.” (Jabuli 111:8) Lubo rwom me kit ma atir ma nonge i Baibul aye obedo yo maber loyo me kwo. Ento, Lubanga pe bidiyowa me lubone. (Nwoyo Cik 30:19, 20; Yocwa 24:15) Obedo tam ma wan ducu ki acel acel omyero wamoki