Kit ma Lweny ki Tim Gero Gudowa Kwede
“Wi lobo tye ka kemme ki rwom me tim gero ma lamal loyo cakke i nge Lweny me Aryo me Wi Lobo dok dano ma romo bilion 2 gikwo ka ma lweny ki tim gero tye iye.”
Lok pa Lalub Kor Karan Madit pa Dul me United Nations, Amina J. Mohammed, 26 Januari, 2023.
Lweny ki tim gero twero cakke atura i kabedo ma kuc tye iye i kare-ni. Kadi wa jo ma gikwo i kabedo ma lweny pe iye pud gitwero kemme ki adwogi maraco me lweny. Dok adwogi maraco ma lweny kelo, rii pi mwaki mapol kadi wa i nge lweny. Nen kong labol magi:
Lweny weko cam bedo nok. Dul me World Food Programme, owaco ni “lweny aye kelo kec madit loyo i wi lobo. Pol pa dano ma gipe ki cam muromo gikwo i kabedo ma lweny tye iye.”
Lweny kelo peko me yotkom kacel ki two wic. Ka dano gitamo ni lweny cok cakke i kabedogi, gibedo ki lworo kacel ki par mukato kare woko. Jo ma gikwo i kabedo ma lweny tye iye, gitwero nongo awano me kom nyo bedo ki peko me two wic. Dok pol pa jo magi nongo pe gitwero nongo kony me ot yat ma gimito.
Lweny ryemo dano ki i gangigi. Ma lubbe ki ripot me Sektemba 2023 pa dul me United Nations High Commissioner for Refugees, dano makato milion 114 i wi lobo guringo guweko gangigi. Pol pa luring ayela magi ducu guringo lweny ki tim gero.
Lweny balo dongo lobo. Wel jami ma mitte pi kwo twero medde matek adada macalo adwogi me lweny. Dano gitwero deno can pien gamente nongo owiro wi cente ma onongo pol kare kitiyo kwede me miyo kony i odi yadi ki gangi pwonnye wek kitii kwede i lweny. Dok ka lweny otum, mitte ni kitii ki cente madwong me roco jami ma oballe.
Lweny balo kabedo ma orumowa. Dano gideno can ka kabedo ma gikwo iye kibalo woko akaka. Pii, yamo, kacel ki ngom ma oballe twero kelo peko me yot kom i kom dano pi kare malac, dok dano gitwero nongo awano ki i bom ma kiyiko i ngom kadi wa i nge gik pa lweny.
Ki lok ada, lweny balo jami dok lanyo cente ma omyero okony dano.