Lweny Mono Bigik Awene?—Gin Ango ma Baibul Waco?

Ma lubbe ki lweny ma lobo Iran ooto i kom lobo Icrael i Ceng Abicel, April 13, 2024, António Guterres, ma telo wi dul me United Nations owacci, “Man aye kare me kweyo kiniga. Man aye kare me jukke kenwa.”

Lweny ma tye ka timme i Middle East obedo labol acel keken pa lweny mapol ma tye ka timme i twok lobo lung.

“I kare-ni, lweny tye ka timme i kabedo mapol loyo i kare mo keken nicakke ma Lweny me Aryo me Wi Lobo otum dok lweny magi tye ka gudo dano ma romo bilion aryo kulu.”—United Nations Security Council, Januari 26, 2023.

Lweny tye ka timme i kabedo mapat pat calo Israel, Gaza, Syria, Azerbaijan, Ukraine, Sudan, Ethiopia, Niger, Myanmar, ki dong Haiti.a

Lweny mono bigik awene? Tika luloc lobo gitwero kelo kuc? Gin ango ma Baibul waco?

Lweny tye ka timme i wi lobo ducu

Lweny ma tye ka timme i wi lobo ducu-ni nyuto ni cokcok-ki lweny ducu bigik. Lweny magi tye ka cobo lok pa lunebi me Baibul ma lubbe ki kare ma wakwo iye. Baibul lwongo kare man ni kare me “agikki.”—Matayo 24:3.

• “Wubiwinyo pi mony, ki lok ma yweko pi mony. . . . rok bilweny ki rok wadi, ki ker bene bilweny ki ker wadi.”—Matayo 24:6, 7.

Kwan pwony ma wiye tye ni ‘Jami Ango ma Tye Lanyut pi “Kare me Agikki”?’ me neno kit ma lweny ma tye ka timme i kare-ni cobo kwede lok pa lunebi me Baibul.

Lweny ma bigiko lweny ducu

Baibul otito ni lweny ma tye ka timme i kare-ni bigik. Meno bitimme nining? Pe bibedo macalo adwogi me yelle pa dano, ento bitimme macalo adwogi me Armagedon, “mony i nino madit pa Lubanga Won Twer Ducu.” (Niyabo 16:14, 16) Lweny me Armagedon biyabo yo bot Lubanga me cobo cikkene pi dano me bedo ki kuc marii nakanaka.—Jabuli 37:10, 11, 29.

Me nongo ngec matut i kom lweny pa Lubanga me giko lweny ducu, kwan pwony ma wiye tye ni “Lweny me Armagedon Obedo Gin Ango?”